Hestamannafélagið Sleipnir fyrsti handhafi Hvatningarverðlauna HSK

Hestamannafélagið Sleipnir, í samstarfi við Sveitarfélagið Árborg, hóf tilraunaverkefni með félagshesthús í upphafi árs 2021. Gafst verkefnið vel og í október 2021 var leigt stórt og hentugt 20 hesta hús fyrir starfsemina, ásamt því að skrifað var undir þriggja ára samstarfssamning sveitarfélagsins og Sleipnis um verkefnið. Samningur var svo framlengdur til þriggja ára nú á haustdögum.

Með þessu verkefni gefst börnum og unglingum tækifæri á að taka þátt í hestamennsku án þess að eiga hest og hafa aðgang að hesthúsi. Þau sækja skipulagða tíma í hesthúsið, þar sem þau fá aðgang að hesti og þeim búnaði sem þarf til að stunda reiðmennsku. Þau læra handtökin við að umgangast og hugsa um hestana, ekki bara það sem einhverjum þætti það skemmtilegasta, að ríða út, heldur líka að moka undan hestunum, þrífa, hugsa um reiðtygin og annað sem þarf að gera þegar stunduð er hestamennska. Inn í það fléttast svo allskonar fræðsla um aðbúnað og heilsufar hestana, hvað þurfi að hafa í huga og fylgjast með þegar við eigum hest.

Síðan hafa þau fengið bæði dýralækni til að koma og spjalla við krakkana um hestana, raspa og gefa lús og ormalyf og eins hefur járningamaður verið að járna og sýnt krökkunum hvað þurfi að hafa í huga við járningu og umhirðu hófa.

Þetta frábæra framtak Sleipnis, hefur orðið til þess að áhugasöm börn og unglingar hafa fengið tækifæri til að kynnast hestamennskunni, án þess að þurfa að leggja í þann kostnað sem henni fylgir.

< Eldri færslur

Nýrri færslur >

Leiðtoganámskeið FEIF í Danmörku í nóvember

10. september 2025

Dagana 21. til 23. nóvember nk. verður haldið leiðtoganámskeið FEIF sem ætlað er ungmennum á aldrinum 18-26 ára. Námskeiðið er á vegum Danska Íslandshestasambandsins (DI) og er haldið í Gringdsted Landbúnaðarskólanum í Billund í Danmörku. Yfirskrift námskeiðsins er „Fighting Fit – Conflict, Fitness & Teamwork in Action“ og markmiðið er að hvetja ungmenni til að taka þátt í félagsstörfum í hestamennsku og að þátttakendur efli færni sína sem leiðtogar. Aðalfyrirlesarar verða Rebekka Hyldgaard, sjúkraþjálfari, sem fjallar um hvernig líkamsþjálfun getur bætt árangur í reiðmennsku, og Professor Janne Winther Christensen frá Aarhus University sem fjallar um nýjustu rannsóknir um „ animal conflict behaviour “. Þátttaka í viðburði sem þessum gefur frábæra reynslu, skapar tengsl og styrkir þátttakendur til frekari leiðtoga og ábyrgðarstarfa innan hestamannafélaganna. Við hvetjum hestamannafélögin til að hvetja fulltrúa sína til þátttöku á þessu námskeiði og minnum á mikilvægi þess að efla ungt fólk til þátttöku í nefndum og störfum innan félaganna til að efla nýliðun ásamt því að móta leiðtoga framtíðarinnar. Nánari upplýsingar um námskeiðið má finna á heimasíðu FEIF. Umsóknarfrestur er 15. október 2025 . Námskeiðið hefst föstudaginn 21. nóvember kl 16:00 og endar sunnudaginn 23. nóvember kl 13:00. Kostnaður er 200€ og innifalið í því er gisting, matur og fræðsla.

Stórmót auglýst til umsóknar

10. september 2025

Landssamband hestamannafélaga auglýsir til umsóknar eftirfarandi mót: · Íslandsmót fullorðinna og ungmenna 2028 · Íslandsmót barna og unglinga 2028 · Íslandsmót í gæðingalist 2026 (innanhússmót sem haldið skal fyrir 15. maí) · Áhugamannamót Íslands 2026 Dagsetningar mótanna eru ákveðnar í samráði við mótshaldara og að teknu tilliti til dagsetninga annarra móta. Á Íslandsmóti fullorðinna og ungmenna er keppt í íþróttakeppni í efsta styrkleikaflokki þar sem keppendur eru einir inni á vellinum í einu. Á Íslandsmóti barna og unglinga er keppt í íþróttakeppni og gæðingakeppni. Á Íslandsmóti í gæðingalist er keppt í öllum aldursflokkum og skal mótið haldið fyrir 15. maí 2026. Á Áhugamannamóti Íslands er keppt í íþróttakeppni og gæðingakeppni í 1., 2. og 3. flokki. Umsóknir áhugasamra mótshaldara skulu berast Landssambandi hestamannafélaga fyrir 1. október nk. á netfangið lh@lhhestar.is .