Úthlutun stórmóta 2023

20. desember 2022

Á dögunum var úthlutun á stóru mótum Landssambandsins gerð klár fyrir keppnisárið 2023.

Þau mót sem á vegum LH voru laus til umsóknar eru Íslandsmót ungmenna og fullorðinna, Íslandsmót barna og unglinga og Áhugamannamót Íslands.

Umsóknir bárust frá félögum um öll mótin þrjú, og kann Landssambandið þeim félögum bestu þakkir fyrir sýndan áhuga á því að taka að sér að halda þau.

Árið 2023 verður að líkindum stórt og viðburðaríkt ár í hestaíþróttunum, og það er ljóst að Íslandsmótin eru mikilvægustu mót ársins á Íslandi í ljósi þess að HM íslenska hestsins er framundan í Hollandi á komandi sumri.

Mótshaldarar eru því í sannkölluðu dauðafæri að gera þessi mót stórskemmtileg áhorfs og það verður spennandi að fylgjast með framvindunni í sumar þar sem landsliðin okkar eru að taka á sig mynd fyrir komandi átök.

Á liðnu landsþingi fyrr í haust var Áhugamannamót Íslands samþykkt undir væng Landssambandsins og kemur því inn á borð sambandsins sem eitt af stóru mótum þess í fyrsta sinn.

Það er ákveðin lyftistöng og viðurkenning á stærð þessa móts og verður gaman að þróa það áfram.

Íslandsmót fullorðinna og ungmenna 29. júní-2. júlí verður haldið af Hestamannafélaginu Sleipni á Selfossi.
Hestamannafélagið Sleipnir hefur á undanförnum árum sannað sig rækilega í mótahaldi á Íslandi með WR móti sínu sem er orðið eitt af stóru viðburðum hestaíþróttanna ár hvert. Aðstaða til mótahalds á Selfossi er til fyrirmyndar og einvala teymi reyndra mótshaldara mun sjá um framkvæmd mótsins.

Íslandsmót barna og unglinga 13.-16. júlí verður haldið á Rangárbökkum við Hellu af Hestamannafélaginu Geysi.
Geysismenn eru margreyndir mótshaldarar, og skemmst er að minnast frábærrar framkvæmdar Landsmóts 2022 og Íslandsmót sama ár. Það er því óhætt að búast við góðu móti við bestu mögulegu aðstæður fyrir Íslandsmót yngri flokka 2023.

Áhugamannamót Íslands 21.-23. júlí verður haldið af Hestamannafélaginu Spretti í Kópavogi.
Sprettur hefur í mörg ár haldið utan um áhugamannadeildina í hestaíþróttum með myndarbrag, og þar með skipað sér stóran sess í mótahaldinu fyrir áhugamenn í hestaíþróttum. Það er því passandi að Sprettur ríði á vaðið með því að halda Áhugamannamót Íslands 2023.

Landssamband Hestamannafélaga óskar þessum Hestamannafélögum til hamingju með úthlutun mótanna þriggja, og það von og trú sambandsins að mótin verði öll hin glæsilegustu.

Fréttasafn

16. nóvember 2026
Styttist í uppskeruhátíð
13. nóvember 2026
Hestamannafélagið Sleipnir mun halda Íslandsmót fullorðinna og ungmenna 16.-20. júní 2027
11. nóvember 2026
Allir í Samskipahöllina annað kvöld
10. nóvember 2026
Knapar ársins verða heiðraðir á Uppskeruhátíð hestafólks
6. nóvember 2026
Heiðursviðurkenningar ÍSÍ veittar á Landsþingi LH
5. nóvember 2026
Gullmerki veitt á Landsþingi
3. nóvember 2026
Könnun til félagsmanna
2. nóvember 2026
Að loknu hverju landsþingi skipar stjórn Landssambands hestamannafélaga í nefndir sambandsins til tveggja ára. Nefndarstörf eru undirstaðan í öllu starfi LH og mikilvægt að fá öfluga sjálfboðaliða sem eru tilbúnir að leggja sitt af mörkum. Nefndastarf á vegum LH er skemmtilegt og fræðandi, auk þess sem störf í nefndum eru gefandi og til þess fallin að efla tengslanet nefndafólks. Ef þú ert tilbúin/n til að starfa í nefnd hjá LH þá sækir þú um á sértöku umsóknareyðublaði . Frestur til að gefa kost á sér í nefndastörf LH er 20. nóvember. Nefndirnar sem um ræðir eru: Keppnisnefnd Keppnisnefnd fjallar um mál sem stjórn LH vísar til hennar en hefur að öðru leyti frumkvæðisrétt að málefnum sem undir hana heyra. Hlutverk nefndarinnar er að bæta reglur er viðkoma keppni í hestamennsku, þannig að þær séu einfaldar, skiljanlegar og skýrar. Laganefnd Hlutverk nefndarinnar er að að bæta regluverk LH, þannig að það sé einfalt, skiljanlegt og skýrt og vera stjórn til ráðgjafar er varðar túlkun á lögum og reglum LH. Nefndin sér einnig um að breytingar á lögum og reglum sem samþykktar eru á FEIF-þingi og landsþingi LH séu rétt færð inn í lög og reglur LH og fara yfir tillögur til landsþings. Landsliðs- og afreksnefnd Hlutverk landsliðs- og afreksnefndar er að móta umgjörð um afreksmál LH og halda utan um landsliðshópa og hæfileikamótun LH. Nefndin er einnig fjáröflunarnefnd fyrir afreksstarf LH. Nefndin skipuleggur landsliðsferðir og fylgir eftir landsliðum Íslands í hestaíþróttum á HM og NM. Mannvirkjanefnd Hlutverk nefndarinnar er að vera ráðgefandi varðandi gerð og notkun mannvirkja á hestaíþróttasvæðum hestamannafélaganna. Einnig ber nefndinni að vera stjórn innan handar varðandi lágmarkskröfur sem gerðar eru til mótshaldara Íslandsmóta og Landsmóta hvað varðar aðstæður á mótssvæði. Menntanefnd Hlutverk nefndarinnar er að vera sérfræðilegur ráðunautur sambandsstjórnar LH í öllum málefnum er varða fræðslu og menntun. Nefndin heldur utan um endurmenntunarnámskeið fyrir reiðkennara og staðfestir virka reiðkennara til FEIF. Annað hvert ár stendur nefndin fyrir endurmenntunarráðstefnu. Tölvunefnd Hlutverk nefndarinnar er að tryggja aðgengi aðildarfélaga LH að framúrskarandi forriti sem reiknar út niðurstöður móta og birtir niðurstöður á aðgengilegan hátt. Nefndin stuðlar að þróun mótaforrits í samræmi við kröfur samtímans. Úrskurðar- og aganefnd Úrskurðar- og aganefnd LH skal skipuð þremur aðalmönnum og tveimur til vara, formaður skal vera löglærður. Úrskurðar- og aganefnd úrskurðar um brot á lögum, reglugerðum og reglum LH og ákvarðar viðurlög, í samræmi við reglur Úrskurðar- og aganefndar. Æskulýðsnefnd Hlutverk Æskulýðsnefndar er að efla fræðslu um æskulýðsmál, gæta hagsmuna og jafnræðis æskunnar í íþróttinni, auka fræðslu æskulýðsfulltrúa um allt land og styðja við þá í starfi. Nefndin sér einnig um val þátttakenda á FEIF Youth Cup og Youth Camp. Útbreiðslu- og nýliðunarnefnd Hlutverk nefndarinnar er að vinna að útbreiðslu og kynningu á hestaíþróttum og stuðla að jákvæðri ímynd hestaíþrótta. Nefndinni er einnig ætlað að vinna að aukinni útbreiðslu og umfjöllun um hestaíþróttir. Öryggisnefnd Hlutverk nefndarinnar er að vera vakandi yfir því sem varðar öryggi hestafólks hvort sem er í búnaði hestafólks eða umhverfi hestaíþrótta. Nefndin stuðlar að öryggi á reiðvegum og annars staðar þar sem hestamennska er stunduð og sér um að fræða hinn almenna hestamann um hvernig hægt er að bæta öryggi í nærumhverfi. Ef þú ert tilbúin til að starfa í nefnd hjá LH þá sækir þú um með því að smella hér .
31. október 2026
Ný stjórn LH kjörin á Landsþingi
31. október 2026
Ragnhildur Gísladóttir dregur framboð til aðalstjórnar til baka
Lesa meira