Menntaráðstefna FEIF og LH 2026

Skráning á Menntaráðstefnu FEIF og LH 23.-25. september er til 15. maí. Hér er kynning á helstu kennurunum sem að ráðstefnunni koma.

Eyjólfur Ísólfsson er einn hinna 5 meistara Félags tamningamanna og gegnir stöðu prófessors við sænska Landbúnaðarháskólann SLU. Hann kennir reglulega á Wangen, býr sjálfur í Danmörku og kennir víða um heim, m.a. á Íslandi af og til. Hann var yfirreiðkennari Hólaskóla í 15 ár og er sannkallaður viskubrunnur hvað varðar fróðleik og reynslu í flestu sem viðkemur þjálfun og kennslu í Íslandshestaheiminum. www.toltmaster.com

Árni Björn Pálsson er einn atkvæðamesti og farsælasti sýnandi á Íslandi, hann á óteljandi Landsmóts- og Íslandsmeistartitla að baki, er ríkjandi Heimsmeistari í tölti T1 og vann nú í vor Meistaradeild Líflands í áttunda skipti! Hann rekur, ásamt Sylvíu konu sinni, hrossaræktarbú að Kvistum, og sinna tamningu og þjálfun bæði eigin hrossa og annarra.

Dr. Sigríður Björnsdóttir hefur verið yfir hrossadýralækningum á Íslandi í fjölda ára ásamt því að vera einn atkvæðamesti vísindamaður landsins í þessum geira. Hún hefur nýlega tekið við starfi prófessors við Hestafræðideildina á Landbúnaðarháskólanum á Hvanneyri og vinnur þar sem fyrr við að bæta heilsu og velferð íslenska hestsins, ásamt kennslu og fræðistarfi. Sigríður mun fjalla um stöðu velferðamála ekki síst hjá keppnishestum og hvað ber að hafa í huga varðandi gangskiptingar og mat þeirra.

Kennarar Hólaskóla, nemendur skólans og skólahestarnir munu leiða okkur í gegnum fyrstu stig gangsetningar og upphaf skeiðþjálfunar, sem og hvernig má kenna og undirbúa sem best þessi mikilvægu atriði í þjálfun gangtegundanna. Tengt verður við hin 10 þjálfunarstig ISES og þróun kennslu gangsetningar og gangskiptinga almennt, bæði fyrir hross og knapa.

Mette Mannseth er ein af 5 meisturum Félags Tamningamanna og aðalreiðkennari Hólaskóla, en hún hefur kennt við skólann síðasta aldarfjórðung. Mette hefur um árabil verið einn farsælasti keppnisknapi landsins og ekki síður gengið vel á kynbótabrautinni, en hún og maður hennar, Gísli, hafa margoft fengið viðurkenningu fyrir ræktun sína á Þúfum. En þrátt fyrir alla velgengni í ræktun, þjálfun og keppni er Mette líklega þekktust fyrir að vera sérlega góður kennari með áratugareynslu bæði hérlendis og erlendis og djúpa innsýn bæði í kennslufræðum og öðru sem viðkemur þjálfun hrossa. www.thufur.is

Þórarinn Eymundsson er einn 5 meisturum Félags tamningamanna og sá þriðji þeirra sem kennir á þessari ráðstefnu. Hann hefur kennt við Hólaskóla í nærri 25 ár ásamt því að sinna kennslu erlendis og reka hrossabú fjölskyldunnar, Hestklett, nú staðsett að Nautabúi í Hjaltadal. Þórarinn hefur unnið til Íslandsmeista- og Landsmótstitla, sem og Heimsmeistaratitla, og hefur notið mikillar velgengni á keppnisvellinum sem og kynbótabrautinni til fjölda ára. Hann er þekktur fyrir að kafa djúpt í þjálfun og er hafsjór fróðleiks og reynslu.

Ísólfur Líndal Þórisson er einn af kennurunum við Hólaskóla og var nýlega ráðinn sem landsliðsþjálfari Íslands í hestaíþróttum. Hann hefur verið farsæll á keppnisbrautinni um árabil, kennir víða bæði hérlendis og erlendis, en einnig í gegnum netið og var kosinn reiðkennari ársins á Íslandi, árið 2020. Ísólfur rekur ásamt fjölskyldu sinni hrossabúið að Staðarhofi í Skagafirði. www.isoonline.is

Þorsteinn Björnsson hefur kennt við Hólaskóla í meira en 15 ár. Hann var kosinn reiðkennari ársins á Íslandi árið 2023 og hefur notið velgengni á keppnisbrautinni, sérstaklega í skeiðgreinum. Þorsteinn hefur síðasta áratuginn séð mikið til um að kenna nemendum skólans að leggja á skeið og mun miðla af þeirri reynslu sinni á ráðstefnunni.

Kafað verður í gangskiptingar, gangsetningu og hraðabreytingar, einnig upphaf skeiðþjálfunar sem og niðurtöku á skeið í keppni. Ætlað reiðkennurum, dómurum og öðru áhugasömu hestafólki! Ekki missa af!

Skráningu lýkur 15. maí!

Hér eru nánari upplýsingar og hér er hægt að skrá sig.

Greiðsla fyrir námskeiðið er í vefverslun LH.

< Eldri færslur

Nýrri færslur >

Rosemarie og Sigurður sæmd heiðursviðurkenningu ÍSÍ

6. nóvember 2026

Heiðursviðurkenningar ÍSÍ veittar á Landsþingi LH

Átta hlutu gullmerki LH

5. nóvember 2026

Gullmerki veitt á Landsþingi

Hver er þín framtíðarsýn fyrir Landsmót

3. nóvember 2026

Könnun til félagsmanna

Vilt þú starfa í nefndum LH?

2. nóvember 2026

Að loknu hverju landsþingi skipar stjórn Landssambands hestamannafélaga í nefndir sambandsins til tveggja ára. Nefndarstörf eru undirstaðan í öllu starfi LH og mikilvægt að fá öfluga sjálfboðaliða sem eru tilbúnir að leggja sitt af mörkum. Nefndastarf á vegum LH er skemmtilegt og fræðandi, auk þess sem störf í nefndum eru gefandi og til þess fallin að efla tengslanet nefndafólks. Ef þú ert tilbúin/n til að starfa í nefnd hjá LH þá sækir þú um á sértöku umsóknareyðublaði . Frestur til að gefa kost á sér í nefndastörf LH er 20. nóvember. Nefndirnar sem um ræðir eru: Keppnisnefnd Keppnisnefnd fjallar um mál sem stjórn LH vísar til hennar en hefur að öðru leyti frumkvæðisrétt að málefnum sem undir hana heyra. Hlutverk nefndarinnar er að bæta reglur er viðkoma keppni í hestamennsku, þannig að þær séu einfaldar, skiljanlegar og skýrar. Laganefnd Hlutverk nefndarinnar er að að bæta regluverk LH, þannig að það sé einfalt, skiljanlegt og skýrt og vera stjórn til ráðgjafar er varðar túlkun á lögum og reglum LH. Nefndin sér einnig um að breytingar á lögum og reglum sem samþykktar eru á FEIF-þingi og landsþingi LH séu rétt færð inn í lög og reglur LH og fara yfir tillögur til landsþings. Landsliðs- og afreksnefnd Hlutverk landsliðs- og afreksnefndar er að móta umgjörð um afreksmál LH og halda utan um landsliðshópa og hæfileikamótun LH. Nefndin er einnig fjáröflunarnefnd fyrir afreksstarf LH. Nefndin skipuleggur landsliðsferðir og fylgir eftir landsliðum Íslands í hestaíþróttum á HM og NM. Mannvirkjanefnd Hlutverk nefndarinnar er að vera ráðgefandi varðandi gerð og notkun mannvirkja á hestaíþróttasvæðum hestamannafélaganna. Einnig ber nefndinni að vera stjórn innan handar varðandi lágmarkskröfur sem gerðar eru til mótshaldara Íslandsmóta og Landsmóta hvað varðar aðstæður á mótssvæði. Menntanefnd Hlutverk nefndarinnar er að vera sérfræðilegur ráðunautur sambandsstjórnar LH í öllum málefnum er varða fræðslu og menntun. Nefndin heldur utan um endurmenntunarnámskeið fyrir reiðkennara og staðfestir virka reiðkennara til FEIF. Annað hvert ár stendur nefndin fyrir endurmenntunarráðstefnu. Tölvunefnd Hlutverk nefndarinnar er að tryggja aðgengi aðildarfélaga LH að framúrskarandi forriti sem reiknar út niðurstöður móta og birtir niðurstöður á aðgengilegan hátt. Nefndin stuðlar að þróun mótaforrits í samræmi við kröfur samtímans. Úrskurðar- og aganefnd Úrskurðar- og aganefnd LH skal skipuð þremur aðalmönnum og tveimur til vara, formaður skal vera löglærður. Úrskurðar- og aganefnd úrskurðar um brot á lögum, reglugerðum og reglum LH og ákvarðar viðurlög, í samræmi við reglur Úrskurðar- og aganefndar. Æskulýðsnefnd Hlutverk Æskulýðsnefndar er að efla fræðslu um æskulýðsmál, gæta hagsmuna og jafnræðis æskunnar í íþróttinni, auka fræðslu æskulýðsfulltrúa um allt land og styðja við þá í starfi. Nefndin sér einnig um val þátttakenda á FEIF Youth Cup og Youth Camp. Útbreiðslu- og nýliðunarnefnd Hlutverk nefndarinnar er að vinna að útbreiðslu og kynningu á hestaíþróttum og stuðla að jákvæðri ímynd hestaíþrótta. Nefndinni er einnig ætlað að vinna að aukinni útbreiðslu og umfjöllun um hestaíþróttir. Öryggisnefnd Hlutverk nefndarinnar er að vera vakandi yfir því sem varðar öryggi hestafólks hvort sem er í búnaði hestafólks eða umhverfi hestaíþrótta. Nefndin stuðlar að öryggi á reiðvegum og annars staðar þar sem hestamennska er stunduð og sér um að fræða hinn almenna hestamann um hvernig hægt er að bæta öryggi í nærumhverfi. Ef þú ert tilbúin til að starfa í nefnd hjá LH þá sækir þú um með því að smella hér .