Framboð í aðalstjórn LH 2026 – 2028

Þórhildur Katrín Stefánsdóttir – Hestamannafélagið Hornfirðingur

Þórhildur Katrín Stefánsdóttir

Ég heiti Þórhildur Katrín Stefánsdóttir og býð mig fram til áframhaldandi setu í aðalstjórn Landssambands hestamannafélaga fyrir tímabilið 2026–2028.

Ég hef setið í stjórn LH frá árinu 2024 og gegnt stöðu varaformanns. Þessi tími hefur verið bæði lærdómsríkur og skemmtilegur og gefið mér góða innsýn í það fjölbreytta starf sem unnið er innan sambandsins.

Á þessum tíma hef ég meðal annars setið í landsliðsnefnd, öryggisnefnd, æskulýðsnefnd og laganefnd LH, auk þess að koma að skipulagningu viðburða á borð við Allra sterkustu og Uppskeruhátíðina. Verkefnin hafa verið fjölbreytt og mér hefur þótt sérstaklega ánægjulegt að fá að vinna með því öfluga fólki sem lætur sig hestamennskuna varða.

Ég er búsett á Djúpavogi, þar sem ég er formaður hestamannafélagsins Glampa, en er alin upp í Mosfellsbænum og á rætur mínar í Herði. Ég er lögfræðingur, sit í sveitarstjórn Múlaþings og hef í gegnum tíðina tekið virkan þátt í ýmiss konar félags- og nefndastarfi.

Ég hef mikinn áhuga á félagsstörfum og brenn fyrir því að efla hestamennskuna, styðja við starf hestamannafélaganna og skapa góðar aðstæður fyrir þá fjölmörgu sem koma að íþróttinni, hvort sem er í keppni, frístundum eða sjálfboðastarfi.

Ég er þakklát fyrir það traust sem mér hefur verið sýnt undanfarin tvö ár og væri ánægð með að fá tækifæri til að halda áfram að leggja mitt af mörkum í stjórn LH.