Framboð í aðalstjórn LH 2026 – 2028

Ólafur Gunnarsson – Hestamannafélagið Jökull

Kynning; Endurkjör til stjórnar Landsambands Hestamannafélaga (LH):

Ég heiti Ólafur Gunnarsson og býð mig fram til áframhaldandi setu í stjórn LH 2026 - 2028. Ég er að ljúka mínu öðru tímabili sem gjaldkeri í stjórninni og hef áhuga, vilja og orku til að halda áfram vinnu að málefnum alls hestafólks og framgangi íslenska hestsins. Ég ætla ekki að telja upp í þessari grein öll þau mál og erindi sem hafa komið inn á borð stjórnar LH þetta stjórnartímabil en vill þó nefna þann góða árangur sem náðst hefur með fjárhag og rekstur LH fyrir árið 2025 og stefnir í jákvæða niðurstöðu fyrir 2026. Fjárhagur, áætlanir og fundargerðir liggja fyrir á vef LH en bendi fólki á að nálgast frekari upplýsingar þar (www.lh.is).

Ég hef haft gríðarlega gaman af starfinu á þessu tímabili og margt hefur áunnist. Mjög öflugt keppnis og afreksstarf hefur verið á síðasta kjörtímabili og árangurinn talar sínu máli. Það er sama hvort litið er til Heimsmeistaramótsins 2025, Norðurlandamóts 2026 og Íslandsmóta í öllum aldursflokkum, framfarir eru augljósar á öllum sviðum. 

Við skulum samt ekki gleyma því að LH er fyrir allt hestafólk og það þarf að eiga sér öfluga rödd innan sambandsins. Um það bil 90% af félagsmönnum keppir ekki og þó margir fylgist með og mæti á mót hefur þessi hópur meiri áhuga á hvernig hægt er að styðja hina almennu hestamennsku. Í því fellst uppbygging reiðvega, öryggismál hestafólks, æskulýðsstarf, aðgengi barna að hestamennskunni, að hafa rödd í umræðu hérlendis og erlendis um velferð íslenska hestsins og svo mætti áfram telja.  Ég vil gæta hagsmuna almenns hestafólks og vinna að framgangi almennrar hestamennsku en að því sögðu styðja vel við keppnis- og afreksstarfið.

Það eru mörg önnur mál sem liggja mér á hjarta og lúta meðal annars að: 

• Framtíð hestamennskunar í stóra samhenginu, greina styrk, veikleika, tækifæri og ógnanir sem nýta má til að móta framtíðarsýn og stefnu. Hér hefur verið unnið mikið starf á síðasta tímabili meðal annars í formlegri stefnumótun. Því starfi vill ég halda áfram.
• Hagspori hestamennskunar. Fylgja eftir með formanni og stjórn því verkefni sem komið er í farveg sem lítur að þessu málefni.
• Aðild Íslands að FEIF og hvernig við getum nýtt okkur frekar þá aðild til að auka veg hestamennskunnar, bæði hér heima og erlendis.
• Klára þau verkefni sem eru á borðinu sem lúta að notkun upplýsingatækni til að halda utan um mótahald og miðla upplýsingum og efni til hestafólks.   
• Notfæra mér þekkingu mína í rekstri og fjármálum til að LH sér rekið á ábyrgan og sjálfbæran hátt.

Að þessu sögðu er ég mjög bjartsýnn á framtíð hestamennskunnar í öllum sínum fjölbreytileika og vil leggja krafta mína fram til að styrkja þá framtíð. Það eru mörg einstök mál sem huga þarf að, klára sum og ýta öðrum úr vör. Ég ætla að leggja þeim lið, hjálpa til við að sameina hestafólk enn frekar og útbreiða þá gleði og lífsfyllingu sem umgengni við íslenska hestinn veitir. 

Bláskógabyggð 26 október 2026.