Skógarhólar hinn geysivinsæli áningarstaður hestamanna í þjóðgarðinum á Þingvöllum hefur fengið góða andlitslyftingu á síðustu misserum.

Skógarhólar eiga sérstakan stað í hjörtum margra hestamanna en þar voru lögð drögin að stofnun LH auk þess sem fyrsta Landsmótið var haldið þar. Staðurin er falin perla, umvafinn einstakri náttúru, sögu og skemmtilegum reiðleiðum.

Talsverðar umbætur hafa verið gerðar á húsinu undanfarin ár. Skipt var um norðurgaflinn á húsinu og einnig var nýtt þak var sett á húsið fyrir nokkrum árum þannig að auðvelt er að halda hita á setustofunni. Í fyrra var tekin í gagnið sturtuaðstaða og klósettaðstaðan er orðin betri, gólfið í eldhúsinu var lakkað og öll herbergi eru nýmáluð. Þá eru einnig ný kolagrill á staðnum.

Hestamenn hafa verið duglegir að panta gistingu í vor en eitthvað er af lausum dögum í sumar. Húsið tekur 30 manns í gistingu og matsalur rúmar allt að 50 manns og fimm næturhólf eru fyrir hesta á Skógarhólum. Þá er einnig hægt að tjalda á staðnum.

Fyrir þá sem ekki þekkja til eru Skógarhólar í eigu Hestamannafélaganna í landinu þar býðst hestamönnum sem eru í hestamannafélögum gisting á sérstökum kjörum. Staðurinn er tilvalinn fyrir hópa og hverskonar hópefli, til dæmis æskulýðshópa hestamannafélaganna. Þá er einnig tilvalið fyrir hópa að koma með hross á kerru, gista eina nótt og ríða út í hinu ómótstæðilega umhverfi sem þjóðgarðurinn býður upp á.

Reiðleiðir í þjóðgarðinum eru fjölbreyttar og einstaklega skemmtilegar og hægt er að fara lengri og styttri hringi eins og sjá má á meðfylgjandi mynd.

Tekið er við bókunum á netfangið skogarholar@lhhestar.is

Sjá nánar á vef LH.