Stjórn Landssambands hestamannafélaga, að fengnu áliti keppnisnefndar, hefur fallist á beiðni framkvæmdanefndar Fjórðungsmóts Vesturlands um að veita undanþágu frá gr. 5 í reglugerð um Landsmót og fjórðungsmót um val hrossa og keppenda á fjórðungsmót, sem snýr að vali keppenda á mótið í barna- og unglingaflokki.
Hestamannafélög sem eiga aðild að Fjórðungsmóti Vesturlands 2025 er veitt heimild til að velja sína fulltrúa á mótið úr hópi knapa í barna- og unglingaflokki sem skráðir voru til úrtöku hjá félögunum.
Undanþágan nær aðeins til barna- og unglingaflokks.
Þetta er gert til þess að félögin geti fyllt sinn kvóta í barna- og unglingaflokki óháð því hvort knapinn hafi gert ólöglega sýningu eða annað komið upp á sem varð til þess að knapanum hafi verið meinuð þátttaka á mótinu.
Stjórn vill undirstrika að undanþága þessi nær aðeins til knapa í barna- og unglingaflokki og er ætlað að auka þátttöku barna- og unglinga í gæðingakeppni og ýta undir útbreiðslu gæðingakeppni og nýliðun í greininni.
Undanþágan er ekki fordæmisgefandi og mun stjórn ekki taka til umfjöllunar frekari beiðnir um undanþágur frá reglugerð um Landsmót og fjórðungsmót.
