1. apríl taka gildi breytingar á reglum sem samþykktar voru á FEIF þingi

Þann fyrsta apríl ár hvert gefa alþjóðasamtökin FEIF út uppfærða útgáfu af lögum og reglum með þeim breytingum sem samþykktar eru á ársþingi þeirra. Á vef LH má finna þýddar útgáfur af reglupakkanum ásamt yfirlitsskjali yfir þær breytingar sem orðið hafa fyrir keppnistímabil ársins. Þar má helst nefna miklar breytingar á reglum um spjaldanotkun og agaviðurlög, en kaflinn um spjaldanotkun og agaviðurlög er nú aðgengilegur sem sérkafli undir flipanum lög og reglur á síðu LH.

Þær breytingar sem orðið hafa falla ýmist undir Almennar reglur um keppni, Reglur um íþróttakeppni og svo fyrrnefndan sérkafla um Spjaldanotkun og agaviðurlög. Þar að auki hafa orðið nokkrar breytingar á leiðara fyrir íþróttadómara, en þýðing á uppfærðum leiðara er í vinnslu og von á að hann verði birtur uppfærður í íslenskri þýðingu fljótlega eftir páska.

Almennar reglur um keppni

Helstu breytingar sem orðið hafa á kaflanum Almennar reglur um keppni eru þær að nú verður það skylda að allir hestar sem mæta til keppni verða að vera örmerktir til þess að hægt sé að auðkenna þá.

Búnaður og notkun hans er alltaf í endurskoðun, sett var inn skerping á orðalagi varðandi staðetningu hnakks, sé hnakkur rangt staðsettur, hvort sem er of aftarlega eða framarlega, gjörð rangt staðsett og svo framvegis getur það leitt til viðurlaga.

Stilling reiðmúla var samræmd og allir reiðmúlar skulu þannig stilltir að bil milli nefólar og neflínu sé a.m.k. 1,5 cm.

Almennar reglur um keppni

Reglur um íþróttakeppni

Ógild sýning (grátt spjald)

Grátt spjald er nýtt í notkun og er gefið þegar framkvæmd sýningar er dæmd ógild. Það á við ef innkoma á völl er ólögleg, hestur fer úr braut, snúið við of oft, ekki hægt niður eftir sýningu o.s.frv. Hingað til hefur knapi hlotið rautt spjald fyrir slíkt, en héðan í frá eru rauð og gul spjöld einungis agaspjöld (sjá kafla um það hér að neðan).

Ítarefni um viðurlög vegna búnaðarskoðunar eru í kafla Í1.7. Þar kemur til dæmis fram að keppnispar er, eins og áður hefur verið, dæmt úr leik ef ekki er hægt að skoða hest sem valinn er til búnaðarskoðunar þrátt fyrir að gefinn hafi verið hæfilegur tími til þess að róa hann niður ásamt því að ef knapi mætir ekki í búnaðarskoðun sé allur árangur hans á mótinu ógildur. Brot á reglum um leyfðan búnað í keppni leiðir til ógildingar sýningar og önnur agaviðurlög geta átt við.

Afskráning úr keppni fyrir úrslit skal tilkynnt að minnsta kosti tveimur klukkustundum fyrir fyrstu úrslit í viðkomandi keppnisgrein en var áður ein klukkustund. Séu reglur um afskráningar brotnar fær knapi skráð á sig 2 rauð spjöld (sjá spjaldanotkun).

Reiðfærni/samband er atriði sem dómarar hafa í huga í gegnum alla sýningu í öllum greinum þar sem gefin er einkunn. Nú er komið í reglur að innkoma á hringvöll og skiptingar milli dómsatriða hafa áhrif á mat dómara á reiðfærni/samband.

Breytingar voru gerðar á kafla Í3.2 varðandi hlaupagæslumenn í kappreiðum, en hlaupagæslumenn skulu hljóta nauðsynlega þjálfun sem samþykkt er af LH. Þetta hefur í för með sér að einungis íþróttadómarar mega sitja í dómsætum þar sem krafist er dómara í kappreiðum en fylla má í önnur pláss með hlaupagæslumönnum í 150 og 250 m skeiði, sbr. mynd Í17.9 bls. 76.

Hæð og staðsetning vindmælis í skeiðkappreiðum er einnig gerð góð skil í uppfærðum reglum og litir á flöggum dómara og hlaupagæslumanna skulu vera rauð og hvít í stað rauðra og grænra sem áður var. Þess má geta að þessi ráðstöfun er gerð til þess að þeir sem þjást af litblindu geti gert greinarmun á lit flagga, en rautt og grænt flagg líta eins út hjá þeim sem þjást af þeim kvilla.

Keppnispör í öllum greinum skulu vera í mættir í upphitunarhring minnst 3 mínútum áður en áætlað er að knapi hefji keppni. Í skeiðgreinum skulu allir keppendur vera komnir með hesta sína í upphitunarhring þremur mínútum áður en viðkomandi keppnisgrein hefst, annars er keppnispar dæmt úr leik í greininni.

Á WR mótum þarf yfirdómari að vera með alþjóðleg dómararéttindi FEIF.

Reglur um íþróttakeppni

Kafli um spjaldanoktun agaviðurlög

Stærsta breytingin sem varð á keppnisreglum fyrir tímabilið er án efa ný og endurskoðuð reglugerð um spjaldanotkun og agaviðurlög.

Reglugerðina í heild sinni má lesa hér.

Knapar og þjálfarar/fjölskyldumeðlimir/vinir/einstaklingar sem þeim tengjast skulu ávallt sýna háttvísi og hlíta kurteisisvenjum. Brot á keppnisreglum, siðareglum og/eða ósanngjörn hegðun gætu fallið undir agaviðurlög.

Spjöld sem notuð verða eru:

• Gult spjald; áminning
• Rautt spjald; alvarleg áminning
• Blátt spjald; heilbrigðisspjald
• Grátt spjald; ógild sýning
• Hvítt spjald; boðað til dómarafundar

Eftifarandi viðurlög má nota ein og sér eða saman vegna brota á reglum:

• Áminning (knapi)
• Alltaf tilkynnt af þul
• Gæti verið skráð hjá LH
• Gæti verið gert opinbert hjá Feif
• Útilokun frá keppnisgrein eða hluta keppnisgreinar (keppnispar)
• Brottrekstur af móti (knapi)
• Keppnisbann (knapi)

Áminningar og keppnisbönn eru skráð og birt á heimasíðu LH og tilkynnt til FEIF innan tiltekins tíma. Gul og rauð spjöld sem gefin eru fylgja knapa yfir keppnistímabilið og leiða ítrekuð brot til keppnisbanns.

Sjá kafla um spjaldareglur og agaviðurlög

Leiðari í íþróttakeppni

Breytingar á leiðara fyrir árið 2026 innihalda breytingu á dómum á skeiði í fimmgangi F1 og F2, eldveggi þegar gult spjald er gefið, útskýringar á spjaldanotkun og afleiðingum þeirra ásamt uppfærðum upplýsingum um búnað.

Við dóm á skeiði í F1 og F2 er búið að bæta við merkingu (M2) 8 m lengra en blómapottarnir (M1) eru staðsettir. Hestur sem ekki er kominn á skeið við fyrri blómapott getur fengið skeiðeinkunn með 2 í frádrátt sé niðurtaka sein, en hann kominn á skeið við merkingu 2. Áður hefur verið gefið 0 í einkunn sé hestur ekki kominn á skeið við fyrstu merkingu. Þetta er talsverð breyting frá því sem áður var á dómum í skeiði í fimmgangi F1 og F2 og keppendur ættu að kynna sér vel.

Í leiðaranum eru reglur um reiðmúla og hnakka sem skýrðar eru hér að ofan útskýrðar enn frekar, ásamt því að spjöldin og afleiðingar þeirra og orsakir fyrir notkun eru skýrð ítarlega.

Uppfærður leiðari á heimasíðu FEIF

Landssamband Hestamannafélaga hvetur alla sem að mótahaldi koma, mótshaldara, dómara, knapa og aðstandendur að kynna sér reglupakkann ítarlega, fara vel yfir þær breytingar sem orðið hafa á reglum frá fyrra ári og hafa þær í huga inn í nýtt keppnistímabil.

Spurningum og vangaveltum um regluverkið er beint til skrifstofu LH, lh@lhhestar.is

Heildaryfirlit yfir breytingar á reglugerðum 2026