Hvað má eiginlega?

27. apríl 2023

Upplýsingar til keppenda

Nú um helgina er fyrsta löglega útimótið hjá hestamannafélögum landsins að hefjast með íþróttamóti Mána á Suðurnesjunum. Mánamenn ríða á vaðið og svo rekur hvert mótið annað fram á haust hjá okkur. Það er því ekki úr vegi að hnikkja á þeim reglum sem í gildi eru varðandi búnað og fleira sem hægt er að taka með sér inn í tímabilið.

Eins og flestir keppendur vita tóku gildi nýjar reglur um leyfðan búnað á þessu tímabili og hér að neðan eru hlekkir sem eru virkilega gagnlegir að skoða í því samhengi:

https://www.lhhestar.is/is/frettir/leyfdur-beislisbunadur-2023(frétt um leyfðan búnað frá 3 apríl 2023).

https://www.feif.org/feif-equipment/(listi yfir leyfðan búnað á heimasíðu FEIF)

https://www.feiffengur.com/documents/FEIF%20Equipment%20Manual_2023.pdf(handbók um búnað með skýringum á helstu hugtökum og fleira).

https://www.feiffengur.com/documents/FAQ_2023.pdf(Skjal frá FEIF með algengum spurningum og svörum þar sem frekari skýringar er að finna á ýmsu þessu tengdu).

Keppnisnefnd LH hélt á dögunum fund með dómurum í íþrótta- og gæðingakeppni þar sem ítarlega var farið yfir gildandi lög og reglur og listanum yfir leyfðan búnað gerð góð skil.

Á fundinum komu fram einlæg tilmæli dómara til mótshaldara og knapa um að veita knöpum möguleika á því að taka með sér búnað á knapafund í upphafi móts og fá úr því skorið hjá yfirdómara hvort búnaðurinn sé sannarlega löglegur ef einhverjar efasemdir eru til staðar.

LH hvetur því keppendur til þess að kynna sér þessar reglur ítarlega og ef vafaatriði vakna er um að gera að fá umsögn yfirdómara mótsins á knapafundi til þess að forðast óþarfa ógildingar á sýningum með tilheyrandi leiðindum.

Skjalið yfir leyfðan búnað

Listinn sem gildir yfir leyfðan búnað er býsna skýr. Þegar upp koma vafamál gildir skjalið á heimasíðu FEIF, og er yfir öllum þýddum skjölum um efnið og er það sem dómarar og starfsmenn móta styðjast við í sínum störfum.

Þegar verið er að velta fyrir sér leyfðum búnaði er góð meginregla að hafa alltaf í huga að kynna sér og þekkja það sem sannarlega er leyft, þ.e. þau atriði sem eru undir grænum lit í skjalinu góða. Einungis þegar upp koma vafaatriði er farið í "rauða listann" til þess að skera úr um þau.

Handbókina og listann yfir algengar spurningar og svör er hægt að hafa til hliðsjónar og útskýringa á hugtökum.

Hringamél

Hringamél mega vera óbrotin (einjárnungur), einbrotin eða tvíbrotin.

Hringamél með fleiri bitum eru ekki leyfð, einungis óbrotin, ein- eða tvíbrotin mél.

Hringamél mega vera með lausum hefðbundnum hringjum, D-hringjum og sporöskjulaga hringju, með eða án tunguboga. 

Svokölluð Þ-mél eru einnig leyfð en þá einungis með enskum múl.

Þegar hringamél eru annarsvegar eru allir festimöguleikar á aðskildum hringjum fyrir höfuðleður eða tauma bannaðir. Mél með stangakeðju eða með festingum á milli méla og múls og hringamél með vogarafli hverskonar eru einnig bönnuð.

Tamningabeisli sem eru nokkuð algeng í notkun orðið (Micklem) eru leyfð en bannað er að nota klemmur sem tengja mélin við múl.

Íslenskar stangir

Stangir eru leyfðar í öllum flokkum og greinum með enskum múl án skáreimar og mótuðum múl án skáreimar.

Stangamél mega vera ein- eða tvíbrotin og tungubogi má vera að hámarki 0,5 cm mælt frá lægsta hluta bogans.

Allir tengipunktar stanganna skulu vera lausir, og allir læsimöguleikar og fastar tengingar eru bannaðar.

Hringurinn sem tengist við höfuðleður skal vera hringlaga en ekki sporöskjulaga (egglaga).

Óbrotin mél (einjárnungar) og mél sem hafa læsimöguleika (lock up ) og mynda þar með einjárnung í vissri stöðu eru bönnuð.

Pelham stangir

Pelham stangir eru leyfðar í keppni en ekki í kynbótasýningum með enskum múl án skáreimar eða mótuðum múl á skáreimar.

Pelham beisli skal nota með tvo tauma og óheimilt er að ríða einungis með einn taum.

Pelham má vera óbrotið, ein- og tvíbrotið og tungubogi má vera að hámarki 0,5 cm mælt frá lægsta hluta bogans.

Mélalaus búnaður

Mélalaus beisli með föstum tengingum fyrir höfuðleður, keðjuól og tauma eru leyfð og skal efni búnaðarins vera mjúkt, án málma eða viðlíka innleggi.

Mélalaus beisli með stangaáhrifum og keðju/ólum er bannað.

Aðeins búnaður sem talinn er upp á leyfðum lista er leyfður til notkunar í keppni og því er upplagt að hafa “græna listann” í huga við val á búnaði inn í keppnistímabilið.

 

Gangi ykkur vel og gleðilegt keppnisár

Mótasvið LH

Fréttasafn

16. nóvember 2026
Styttist í uppskeruhátíð
13. nóvember 2026
Hestamannafélagið Sleipnir mun halda Íslandsmót fullorðinna og ungmenna 16.-20. júní 2027
11. nóvember 2026
Allir í Samskipahöllina annað kvöld
10. nóvember 2026
Knapar ársins verða heiðraðir á Uppskeruhátíð hestafólks
6. nóvember 2026
Heiðursviðurkenningar ÍSÍ veittar á Landsþingi LH
5. nóvember 2026
Gullmerki veitt á Landsþingi
3. nóvember 2026
Könnun til félagsmanna
2. nóvember 2026
Að loknu hverju landsþingi skipar stjórn Landssambands hestamannafélaga í nefndir sambandsins til tveggja ára. Nefndarstörf eru undirstaðan í öllu starfi LH og mikilvægt að fá öfluga sjálfboðaliða sem eru tilbúnir að leggja sitt af mörkum. Nefndastarf á vegum LH er skemmtilegt og fræðandi, auk þess sem störf í nefndum eru gefandi og til þess fallin að efla tengslanet nefndafólks. Ef þú ert tilbúin/n til að starfa í nefnd hjá LH þá sækir þú um á sértöku umsóknareyðublaði . Frestur til að gefa kost á sér í nefndastörf LH er 20. nóvember. Nefndirnar sem um ræðir eru: Keppnisnefnd Keppnisnefnd fjallar um mál sem stjórn LH vísar til hennar en hefur að öðru leyti frumkvæðisrétt að málefnum sem undir hana heyra. Hlutverk nefndarinnar er að bæta reglur er viðkoma keppni í hestamennsku, þannig að þær séu einfaldar, skiljanlegar og skýrar. Laganefnd Hlutverk nefndarinnar er að að bæta regluverk LH, þannig að það sé einfalt, skiljanlegt og skýrt og vera stjórn til ráðgjafar er varðar túlkun á lögum og reglum LH. Nefndin sér einnig um að breytingar á lögum og reglum sem samþykktar eru á FEIF-þingi og landsþingi LH séu rétt færð inn í lög og reglur LH og fara yfir tillögur til landsþings. Landsliðs- og afreksnefnd Hlutverk landsliðs- og afreksnefndar er að móta umgjörð um afreksmál LH og halda utan um landsliðshópa og hæfileikamótun LH. Nefndin er einnig fjáröflunarnefnd fyrir afreksstarf LH. Nefndin skipuleggur landsliðsferðir og fylgir eftir landsliðum Íslands í hestaíþróttum á HM og NM. Mannvirkjanefnd Hlutverk nefndarinnar er að vera ráðgefandi varðandi gerð og notkun mannvirkja á hestaíþróttasvæðum hestamannafélaganna. Einnig ber nefndinni að vera stjórn innan handar varðandi lágmarkskröfur sem gerðar eru til mótshaldara Íslandsmóta og Landsmóta hvað varðar aðstæður á mótssvæði. Menntanefnd Hlutverk nefndarinnar er að vera sérfræðilegur ráðunautur sambandsstjórnar LH í öllum málefnum er varða fræðslu og menntun. Nefndin heldur utan um endurmenntunarnámskeið fyrir reiðkennara og staðfestir virka reiðkennara til FEIF. Annað hvert ár stendur nefndin fyrir endurmenntunarráðstefnu. Tölvunefnd Hlutverk nefndarinnar er að tryggja aðgengi aðildarfélaga LH að framúrskarandi forriti sem reiknar út niðurstöður móta og birtir niðurstöður á aðgengilegan hátt. Nefndin stuðlar að þróun mótaforrits í samræmi við kröfur samtímans. Úrskurðar- og aganefnd Úrskurðar- og aganefnd LH skal skipuð þremur aðalmönnum og tveimur til vara, formaður skal vera löglærður. Úrskurðar- og aganefnd úrskurðar um brot á lögum, reglugerðum og reglum LH og ákvarðar viðurlög, í samræmi við reglur Úrskurðar- og aganefndar. Æskulýðsnefnd Hlutverk Æskulýðsnefndar er að efla fræðslu um æskulýðsmál, gæta hagsmuna og jafnræðis æskunnar í íþróttinni, auka fræðslu æskulýðsfulltrúa um allt land og styðja við þá í starfi. Nefndin sér einnig um val þátttakenda á FEIF Youth Cup og Youth Camp. Útbreiðslu- og nýliðunarnefnd Hlutverk nefndarinnar er að vinna að útbreiðslu og kynningu á hestaíþróttum og stuðla að jákvæðri ímynd hestaíþrótta. Nefndinni er einnig ætlað að vinna að aukinni útbreiðslu og umfjöllun um hestaíþróttir. Öryggisnefnd Hlutverk nefndarinnar er að vera vakandi yfir því sem varðar öryggi hestafólks hvort sem er í búnaði hestafólks eða umhverfi hestaíþrótta. Nefndin stuðlar að öryggi á reiðvegum og annars staðar þar sem hestamennska er stunduð og sér um að fræða hinn almenna hestamann um hvernig hægt er að bæta öryggi í nærumhverfi. Ef þú ert tilbúin til að starfa í nefnd hjá LH þá sækir þú um með því að smella hér .
31. október 2026
Ný stjórn LH kjörin á Landsþingi
31. október 2026
Ragnhildur Gísladóttir dregur framboð til aðalstjórnar til baka
Lesa meira