Íslandsmót barna og unglinga hefst á morgun

Á morgun, miðvikudag, hefst Íslandsmót barna og unglinga á félagssvæði hestamannafélagsins Sleipnis á Brávöllum á Selfossi. Mikill fjöldi skráninga er á mótinu, í heildina um 480 skráningar. Á mótinu er keppt í barnaflokki og unglingaflokki í hefðbundnum íþróttagreinum, þ.e. tölti, slaktaumatölti, fjórgangi, fimmgangi, gæðingaskeiði og 100m skeiði. Þar að auki er keppt í gæðingakeppni og gæðingatölti í bæði barna- og unglingaflokki. Mjög góð þátttaka er í allar greinar og dreyfist fjöldinn nokkuð jafnt.

Dagskráin hefst sem fyrr segir miðvikudaginn 22.júlí kl. 11 á keppni í fjórgangi unglinga. Þar á eftir verður keppt í fjórgangi barna. Á fimmtudag hefst keppnisdagurinn á keppni í slaktaumatölti barna og unglinga, þá verður keppt í gæðingatölti, fimmgangi unglinga og barnaflokki gæðinga. Á föstudag verður keppt í gæðingaskeiði, tölti og unglingaflokki gæðinga. Laugardagur verður B-úrslita dagur auk þess sem keppt verður í 100m skeiði. A úrslit fara fram sunnudaginn 26.júlí.

Hestakosturinn á mótinu er feiknasterkur og líklegt er að bæði knapar og hestar séu í fanta formi eftir þátttöku á Landsmóti fyrr í sumar. Það verður því gaman að fylgjast með á Brávöllum á Selfossi en mótið verður jafnframt sýnt beint á Eiðfaxa TV.

Landssamband hestamannafélaga óskar keppendum, mótshöldurum og aðstandendum góðs gengis og frábærrar skemmtunar.