Mótssvæði HM 2027 mátað

15. FEIF Youth Cup fór fram dagana 13.–19. júlí í Gut Matheshof í Rieden í Þýskalandi en þar mun Heimsmeistarmót Íslenska hestsins fara fram 2027. Viðburðurinn er haldinn annað hvert ár og samanstendur af stífri þjálfun, alþjóðlegri liðakeppni og menningarsamskiptum í kringum íslenska hestinn. Markmið vikunnar er að efla samvinnu, alþjóðlega vináttu og bæta reiðmennsku ungmenna. Alls tóku 69 þátttakendur frá 10 aðildarlöndum FEIF þátt, þar af sjö knapar frá Íslandi. Íslensku knaparnir sem tóku þátt eru Anita Liv Snævarsdóttir, Aníta Líf Magnúsdóttir, Jóhanna Dýrleif Guðjónsdóttir, Rebecca Luise Lehmann, Sigríður Fjóla Aradóttir, Súsanna Guðlaug Halldórsdóttir og Unnur Rós Ármannsdóttir. Með hópnum fór Dagbjört Hulda Guðbjörnsdóttir formaður æskulýðsnefndar LH. 

Ferðalagið og fyrstu skrefin

​Ferð íslenska hópsins hófst sunnudagskvöldið 12. júlí. Ferðalagið til Rieden gekk vel og á mánudeginum tók hópurinn á móti lánshestum sínum og fór með þá í dýralæknaskoðun. Þar sem ekki er gerlegt að ferðast með hesta frá Íslandi reiða íslensku þátttakendurnir sig á lánshesta á mótinu. 

​Seinni part dags var farið í reiðtíma hjá Chrissy Seipolt sem sá um að para saman knapa og lánshesta. Um kvöldið var öllum þátttakendum skipt í 11 alþjóðleg lið, sem hvert hafði sinn liðsstjóra (Team Leader). Fyrsta verkefnið var að velja liðsnafn út frá úthlutuðum bókstaf og velja einkennislag liðsins sem spilað var þegar liðsfélagar unnu sína grein.

Fjölbreyttar æfingar og skemmtileg dagskrá

​Á þriðjudegi og miðvikudegi mættu liðin á tvær æfingar á dag hjá sérgreinaþjálfurum:

• Svenja Braun sá um trail-æfingar. 
• ​Chrissy Seipolt sá um gangtegundaæfingar. 
• Reinhard Loidl sá um töltæfingar. 
• ​Bea Rusterholz sá um dressage æfingar. 
• ​Lisa Schürger og Freija Thye sáu um skeið- og flag race-æfingar. 

​Á þriðjudagskvöldinu var haldið glæsilegt þjóðarkvöld þar sem hvert land kynnti sína menningu með skemmtiatriði og bauð upp á góðgæti að heiman. Miðvikudagskvöldið nýttu Dressage-knapar vel í aukalega æfingu til að festa prógrammið í minni.

Keppnin hefst og hátíðleg setningarathöfn

​Á fimmtudeginum var farið á síðustu æfinguna og dýralæknaskoðunin Fit to Compete fór fram þar sem allir hestar stóðust skoðun. Eftir myndatökur og afhendingu á svokölluðum „Lucky pots“ hófst keppni á trail og tölti T4. 

​Á föstudeginum hélt keppni áfram í F2, T7, T3 og Gæðingaskeiði PP2. Eftir hádegi fór fram táknræn setningarathöfn þar sem knapar gengu fyrst inn með löndum sínum með sínum fararstjóra og fánabera og á eftir komu liðstjórarnir með sína liðsfána. Á vellinum færðu þátttakendur sig yfir til sinna liðsstjóra og voru í liðabolum sínum, en hvert lið hefur sinn lit og fá þátttakendur boli í liðalit sínum. Eftir að veitt voru verðlaun fyrir trail og gæðingaskeið hélt keppnin áfram í V5, V2 og dressage, sem þurfti þó að stöðva vegna þrumuveðurs. Um kvöldið þreyttu liðin skriflegt fræðipróf (Theory test) um FEIF og íslenska hestinn.

Lokaúrslit og verðlaunahátíð

​Á laugardaginn var komið að lokadegi keppninnar. Dagurinn hófst á að klára dressage, auk þess sem keppt var í flag race og 100m flugskeiði. A-úrslit fóru fram í T7, T3 og T4 fyrir hádegi, og V5, V2 og F2 eftir hádegi. 

​Mótinu lauk með glæsilegri lokaathöfn. Veitt voru verðlaun fyrir einstakar greinar, stigahæstu liðin og stigahæsta knapa mótsins. Þá var FEIF fjöðrin veitt fyrir sérstaklega fagra, mjúka og næma reiðmennsku. Um kvöldið var haldið myndakvöld og kveðjupartý.

Lærdómsríkt ævintýri og varanleg vinátta

​Að keppa á lánshestum er ævinlega áskorun, sérstaklega þar sem lítill tími gafst til að prófa hestana fyrir mótið vegna Landsmóts heima á Íslandi. Þótt væntingar um hesta hafi ekki gengið eftir hjá öllum stóð íslenski hópurinn sig frábærlega í að stilla hugarfarið, gera sitt besta og taka virkan þátt. 

​Ferðin skilaði bæði persónulegum og keppnislegum sigrum, og mikilvægast af öllu: alþjóðlegri vináttu og góðum minningum. Strax er vitað til þess að nokkrir erlendir þátttakendur hafa nú þegar bókað eða skipulagt ferðir til Íslands til að heimsækja nýju vini sína og upplifa íslenska hestinn í sínu náttúrulega umhverfi.