Jólakveðja frá formanni LH

Árið 2025 hefur verið mjög viðburðaríkt hjá hestamönnum landsins ef marka má fréttir af viðburðum, ferðum, námskeiðahaldi, keppni, útgáfu fræðslumynda og bóka og svo mætti lengi telja.

Stjórn, starfsmenn og nefndir hjá Landssambandi hestamannafélaga hafa haft úr miklu að moða og það verður að segjast eins og er að það er ekki lognmolla í kringum hestafólk eða málefni tengdum hestum bæði innanlands sem erlendis.

Við byrjuðum árið með trompi þegar Sigurbjörn Bárðarson hlaut þann heiður að vera kosin í Heiðurshöll ÍSÍ. Það er fyrsta skipti sem hestamaður kemst í Heiðurshöllina og hann er auk þess sá fyrsti og eini sem hefur verið kjörinn Íþróttamaður ársins og það var árið 1993.

Það var mikil áhersla lögð á árinu í undirbúning fyrir Heimsmeistaramótið í Sviss þar sem bretta þurfti upp ermar og safna peningum til að senda fríðan flokk knapa og hesta á mótið. Með samhentum hópi í landsliðsnefnd og miklum stuðningi styrktaraðila náðist góður árangur við að fjarmagna ferðina sem stuðlaði svo að enn betri árangri landsliða okkar.

Allra sterkustu 2025 tókst mjög vel og voru atriðin sem sýnd voru frábær og stuðningur þeirra sem mættu, styrktu landsliðin okkar og keyptu folatolla er ómetanlegur. Við þökkum öllum sem tóku þátt og lögðu okkur lið, fyrir stuðninginn.

Stóra málið hjá stjórn LH á árinu var að snúa við taprekstri á rekstri sambandsins sem hefur verið viðloðandi seinustu árin og það tókst með samstilltu átaki starfsmanna og stjórnar.

Á vordögum leiddi stjórnin stefnumótun fyrir árin 2026 til 2030 og tóku félögin um landið virkan þátt og var þeirri vinnu svo framhaldið á formannafundi sem haldinn var í október. Stefnumótunin er á lokametrunum og verður kynnt vel á nýja árinu.

Við höfum unnið þétt að því að auka sýnileika okkar innan ÍSÍ og eitt skref í þá átt var að fá kjörinn fulltrúa hestamanna í framkvæmdastjórn ÍSÍ. Það var sögulegur viðburður þegar Þórdís Anna Gylfadóttir náði frábæru kjöri í stjórn með næstflestum fjölda atkvæða.

Við vorum virk í alþjóðlegu samstarfi bæði með Norðurlandaþjóðunum og FEIF, við mótuðum nýja stefnu í Landsliðsnefnd, réðum nýja þjálfara, opnuðum nýja vefsíðu, gerðum tilraun með teljara á reiðstígum, tókum þátt í umræðu um taðlosun og beittum okkur þar og svo mætti lengi telja.

Við erum að kveðja flott ár og hefja nýtt ár með öllum þeim spennandi verkefnum sem liggja fyrir. Gróskan er gífurleg í hestamennskunni á Íslandi hvort sem er í almennri reiðmennsku eða í keppni. Félögin í kringum landið eru mjög virk í námskeiðshaldi og eitthvað í boði fyrir alla. Reiðskólar sem eru grunnurinn af nýliðuninni blómstra og fimleikar á hestum er grein sem er að slá í gegn hjá börnum og unglingum.

Við erum að fara inn í stórt keppnisár þar sem Landsmót 2026 verður haldið að Hólum á vegum Skagfirðings, Íslandsmót fullorðinna hjá Sörla í Hafnarfirði og Íslandsmót barna og unglinga hjá Sleipni á Selfossi.

Við stefnum líka á að fara með sterkan hóp úr landsliðunum okkar á Norðurlandamótið sem verður haldið að Margrétarhofi í Svíþjóð í sumar. Við hlökkum til að sjá ykkur öll á þessum og öðrum mótum ársins.

En það eru einnig fjölmörg önnur verkefni sem liggja fyrir. Stóru málin hjá félögunum kringum landið eru skipulagsmál. Á mörgum stöðum og þá aðallega í þéttbýli er verið að þrengja að hestamannahverfunum og á öðrum stöðum er verið að þrengja að reiðleiðum og jafnvel verið að loka á þekktar þjóðleiðir. Hér er mikilvægt að félögin með stuðningi Landssambandsins myndi sterka heild til að verja hagsmuni hestamanna. Við verðum að standa saman og tryggja að sveitafélögin hafi okkur alltaf með sem umsagnaraðila þegar skipulag er rætt eða stendur til að breyta því.

Mig langar að lokum að þakka ykkur öllum fyrir þetta viðburðaríka ár. Þetta var fyrsta heila starfsárið mitt sem formaður og ég hef haft bæði ánægju og gleði að þvi að vinna að málefnum hestamanna vítt og breitt. Við erum með frábært starfsfólk og mjög sterka stjórn sem vinnur ötullega að hagsmunum hestafólks og hestamennskunar.

Ég óska ykkar gleðilegra jóla og farsældar á komandi ár. Ég hlakka til samstarfsins á nýja árinu og stóra ársins sem fram undan er. Höldum í gleðina, jákvæðnina og samheldnina.

Jóla- og nýárskveðja,

Linda Björk Gunnlaugsdóttir

< Eldri færslur

Nýrri færslur >

Opið er fyrir umsóknir í Hæfileikamótun LH 2026-2027

17. september 2026

Hæfileikamótun LH er fyrir unglinga fædd 2010-2013

Vigdís Matthíasdóttir ráðin yfirþjálfari Hæfileikamótunar LH næstu tvö árin

16. september 2026

Vigdís Matthíasdóttir er nýr yfirþjálfari Hæfileikamótunar LH

Íslandsmót auglýst til umsóknar

14. september 2026

Íslandsmót og Áhugamannamót eru auglýst til umsóknar

Reiðvegir Íslands – saga reiðleiða og reiðvega frá landnámi til nútíma

11. september 2026

Landssamband hestamannafélaga kynnir ritið Reiðvegir Íslands – Saga reiðleiða og reiðvega frá landnámi til nútíma. Frá hófförum í klöpp til stafrænnar kortasjár , eftir Halldór H. Halldórsson sem nú er aðgengilegt á vef LH undir flipanum almenningsíþróttin - reiðvegamál. Um aldir lágu leiðir milli byggða um heiðar, dali og hálendi, mótaðar af ferðum kynslóðanna. Hesturinn var helsta samgöngutæki landsmanna og reiðleiðirnar lífæð samgangna; þær tengdu fólk og byggðir, auðvelduðu samskipti og urðu með tímanum hluti af sögu og menningararfi þjóðarinnar. Í Reiðvegum Íslands er saga þessara leiða rakin frá landnámi til samtímans. Fjallað er meðal annars um fornar þjóðleiðir, leiðir til Þingvalla, landpósta og þróun samgangna, auk helstu hálendisleiða um Kjöl, Sprengisand og Arnarvatnsheiði. Einnig er fjallað um Hellisheiði og Kolviðarhól og þær miklu breytingar sem urðu á samgöngum þegar bíllinn tók við af hestinum sem helsta samgöngutæki þjóðarinnar. Sagan er þó ekki aðeins rakin aftur í tímann. Ritið fjallar jafnframt um þróun reiðvegagerðar á síðari áratugum, skipulags- og fjármögnunarmál, skráningu reiðleiða og tilurð Kortasjár Landssambands hestamannafélaga. Þannig er leitast við að tengja saman sögu gömlu þjóðleiðanna og það reiðvegakerfi sem hestamenn landsins byggja á í dag. Bókin byggir á áratuga vinnu höfundar við málefni reiðvega og samgangna innan hestamennskunnar, auk umfangsmikillar söfnunar heimilda, korta, ljósmynda og annarra gagna. Markmiðið er að varðveita sögu reiðleiðanna en um leið draga fram mikilvægi reiðvega sem hluta af samgönguinnviðum landsins, menningararfi þess og þeirri lifandi hefð sem íslensk hestamennska byggir á. Um höfundinn Halldór H. Halldórsson hefur um áratugaskeið unnið að reiðvega- og samgöngumálum hestamanna. Hann sat í stjórn Landsmóts hestamanna árið 2000 og í varastjórn Landssambands hestamannafélaga 2002–2006. Hann tók sæti í Ferða- og samgöngunefnd LH árið 2002 og var formaður nefndarinnar frá 2006 til 2020. Auk þess hefur Halldór komið að reiðvegamálum á vettvangi hestamannafélaga og tekið virkan þátt í uppbyggingu, skráningu og stefnumótun reiðleiða og reiðvega. Sú reynsla, ásamt áratuga söfnun heimilda um samgöngusögu ríðandi fólks, myndar grunninn að Reiðvegum Íslands. Með útgáfu ritsins er þessi saga tekin saman og gerð aðgengileg hestamönnum og öðrum þeim sem áhuga hafa á samgöngusögu Íslands, íslenska hestinum og þeim leiðum sem tengt hafa byggðir landsins saman frá fyrstu tíð.

Veikindi í hestum á NM af völdum myglu í heyi

11. september 2026

Á nýlega afstöðnu Norðurlandamóti íslenska hestsins í Svíþjóð komu upp veikindi í þremur hrossum danska landsliðsins. Þær sorglegu fréttir bárust í vikunni að einn af þeim hestum sem veiktust á mótinu sé nú fallinn. Á alþjóðlegum mótum sem þessu eru hross frá hverju landi hýst aðskilin og líkamshiti allra hrossa mældur tvisvar á dag. Þetta verklag varð til þess að veikindin uppgötvuðust snemma og veikindin virðist hafa haldist innan afmarkaðs hóps. Sýnataka fór strax af stað til að útiloka alvarlega smitsjúkdómavalda eins og EHV-1 og EIV (hestainflúensu) og anaplasmósu, sem er bakteríusjúkdómur sem berst með skógarmítlum og einkennist meðal annars af háum hita. Niðurstöður rannsókna voru neikvæðar fyrir þessa sjúkdóma og einnig fyrir svokallaða hitasótt sem við þekkjum hér á landi síðan 1998 (eCov). Einnig var skoðað hvort veikindin væru tengd fóðri. Tekin voru sýni úr heyi sem hestarnir sem veiktust fengu og niðurstöður þeirrar rannsóknar benda sterklega til að myglusvepp í heyinu sé um að kenna. Ekki er vitað til þess að fleiri hross hafi veikst síðan að mótinu lauk en knapar hafa verið beðnir um að fylgjast vel með heilsu sinna hesta á næstu vikum. Allir knapar íslenska landsliðsins voru vel upplýstir um stöðu mála á mótinu og hvaða smitvarnarráðstöfunum ætti að fylgja við heimkomu. Íslenski hrossastofninn er einangraður og hefur því takmarkað ónæmi gegn mörgum þeim smitsjúkdómum sem finnast erlendis. Auk þess eru aðstæður hér á landi þannig að þéttleiki hrossa er mikill í stórum hesthúsahverfum og hross ferðast mikið á milli landshluta til dæmis á mótum, í stóðréttum, graðhestagirðingum og hestaferðum. Reynsla af fyrri faröldrum sýna að smit breiðist hratt út hér á landi og gæti reynst mjög erfitt að hefta útbreiðslu smitsjúkdóms þegar hann er kominn til landsins á annað borð. Ýtrustu kröfur eru í gildi hér á landi til að verjast smitsjúkdómum í dýrum. Innflutningur notaðra reiðtygja, reiðhanska, leður- og vaxfatnaðar er með öllu óheimill. Annan reiðfatnað má taka með sér hafi hann verið þveginn fyrir komu til landsins. Matvælastofnun og Landssamband hestamannafélaga benda öllum hestamönnum á að kynna sér leiðbeiningar á heimasíðu MAST og leiðbeina erlendum gestum og ferðamönnum á sínum vegum.

Kristín Eir Hauksdóttir Holaker stigahæsti knapi í unglingaflokki á Íslandsmóti 2026

28. ágúst 2026

Við yfirferð úrslita frá Íslandsmóti barna og unglinga 2026 kom í ljós að ranglega var tilkynnt um stigahæsta knapa í unglingaflokki. Ástæðu þess má rekja til þýðingarvillu í íslenskri útgáfu keppnisreglna FEIF sem hafði áhrif á útreikning stiganna. Samkvæmt leiðréttum útreikningum er Kristín Eir Hauksdóttir Holaker stigahæsti knapi í unglingaflokki á Íslandsmóti 2026. Landssamband hestamannafélaga og mótshaldari Hestamannafélagið Sleipnir biðja hlutaðeigandi innilega velvirðingar á þeim óþægindum sem þetta kann að hafa valdið. Við óskum Kristínu Eir hjartanlega til hamingju með árangurinn.