Vel heppnuðu Landsmóti á Hólum lokið

Vel heppnuðu Landsmóti hestamanna 2026 á Hólum í Hjaltadal er lokið. Framkvæmd mótsins tókst vel til og fjöldi gesta lagði leið sína norður til að fylgjast með bestu hestum og knöpum landsins. Hestakostur á mótinu var frábær og áhorfendur urðu vitni að nokkrum met sýningum bæði í kynbótadómum og keppni. Nokkuð vel rættist úr veðrinu þó að heldur hressilega hafi blásið síðstu dagana. Hjaltadalurinn heldur vel utan um gesti mótsins og góð stemming var í brekkunni frá fyrsta degi. 

Áfram, líkt og síðustu ár, má sjá gríðarlegan metnað og miklar framfarir á sýningum í yngri flokkum. Greinilegt er að hestamannafélög landsins leggja mörg hver mikinn metnað í yngri flokka starf sem bæði ýtir undir áhuga og eflir fagmennsku. Í heildina voru 400 skráningar í barnaflokk, unglingaflokk, B flokk ungmenna og A flokk ungmenna og fjöldi góðra sýninga eykst milli Landsmóta. 

Fyrstu sigurvegarar Landsmóts voru krýndir á fimmtudagskvöld þegar seinni umferðir í kappreiðaskeiði fóru fram. Landsmótssigurvegari í 250m skeiði er Konráð Valur Sveinsson og Kastor frá Garðshorni á Þelamörk en þeir fóru á tímanum 22,18 sek. Konráð Valur Sveinsson átti jafnframt besta tímann í 150m skeiði en þar sat hann Kjark frá Árbæjarhjáleigu 2 og fóru þeir á tímanum 13,84 sek. Konráð með afreks skeiðhestana sína tvo, Kastor og Kjark, endurtók þar með leikinn frá LM 2024 og sigraði tvöfalt. Glæsilegur árangur hjá Konráð sem með þessum sigri tryggði sér Landsmótstitil í 250m skeiði fjórða Landsmótið í röð. 

Keppni í 100m skeiði fór fram á föstudagskvöldi og þar öttu kappi fljótustu skeiðhestar landsins. Landsmótssigurvegari í 100m skeiði er Eyrún Ýr Pálsdóttir og Friðsemd frá Kópavogi en þær fóru á tímanum 7,46 sek. Föstudagskvöldinu lauk með frábærum úrslitum í tölti. Líkt og á Íslandsmóti voru það tveir knapar sem börðust um sigur, þeir Jakob Svavar Sigurðsson á Skarpi frá Kýrholti og Ásmundur Ernir Snorrason á Hlökk frá Strandarhöfði. Í þetta sinn voru það Ásmundur og Hlökk sem stóðu uppi sem Landsmótssigurvegarar í tölti. Einkunn þeirra var 9,78 sem er hæðsta einkunn sem gefin hefur verið í töltúrslitum. Sannarlega glæsilegur árangur hjá Ásmundi. 

Úrslitadagurinn hófst á feikna sterkum úrslitum í B flokki ungmenna. Eftir spennandi viðureign á greiðu tölti var það Guðmar Hólm Ísólfsson Líndal á Gretti frá Hólum sem stóð uppi sem Landsmótssigurvegari. Þeir hlutu einkunina 8,87. Næst var komið að úrslitum í unglingaflokki. Þar var spennan ekki minni en það var að lokum 0,005 sem skar úr um sigurvegara. Landsmótssigurvegari í unglingaflokki er Gabríel Liljendal Friðfinnsson á Ólsen frá Egilsá og hlutu þeir 8,79 í einkunn. 

Næstu tvö úrslit voru úrslit í sýningagreinum mótsins. Í B flokki áhugamanna var það Hannes Sigurjónsson á Heiðri frá Eystra-Fróðholti sem stóð uppi sem sigurvegari. Einkunn þeirra var 8,67. Í A flokki ungmenna tryggði Guðmar Hólm Ísólfsson Líndal sér annan sigur á Kalsa frá Þúfum. Einkunn þeirra var 8,71. Sannarlega glæsilegur árangur á mótinu hjá Guðmari Hólm. Guðmari var jafnframt veittur Öder bikarinn, farandgripur sem veittur er framúrskarandi pari, ungum reiðmanni og hesti hans, sem standa fyrir glæsileika og ferguð í íslenskri reiðmennsku, faglegur og prúður knapi ásamt vel tömdum, heillandi hesti sem saman leysa verkefnið sitt af ástríðu og prýði. Öder bikarinn er veittur til minningar um Einar Öder Magnússon. 

Í úrslitum í barnaflokki voru margar afar fallegar sýningar. Viktoría Huld Hannesdóttir og Þinur frá Enni komu aftur til leiks og strax í forkeppni sást að þau ætluðu sér að endurtaka leikinn frá LM 2024. Þau tilltu sér á toppinn eftir sérstaka forkeppni og héldu því sæti alla leið til loka A-úrslita. Landsmótssigurvegari í barnaflokki, annað Landsmótið í röð, eru Viktoría Huld Hannesdóttir og Þinur frá Enni með einkunina 9,06. Frábært par. 

Í B flokki var það Kór frá Skálakoti ásamt knapa sínum Jakobi Svavari Sigurðssyni sem stóðu uppi sem sigurvegarar. Einkunn þeirra var 9,19. A úrslitin í B flokki voru jöfn og spennandi en í þetta sinn voru það 4 frábærir stóðhestar sem röðuðu sér í topp sætin.

Félag tamningamanna veitti Elinu Holst og Ásmundi Erni Snorrasyni FT fjöður fyrir sýningar sýnar á Hugsýn frá Ketilsstöðum og Hlökk frá Strandarhöfði. Þá hlaut Brynja Kristinsdóttir reiðmennskuverðlaun FT en þau verðlaun eru veitt knapa sem sýnir framúrskarandi reiðmennsku og framkomu með hesta sína, hvort sem er í kynbótasýningum eða í keppni. 

Landsmóti 2026 lauk með frábærum úrslitum í A flokki gæðinga. Landsmótssigurvegari í A flokki er hinn frábæri gæðingur Sindri frá Hjarðartúni ásamt knapa sínum Hans Þór Hilmarssyni. Einkunn þeirra var 9,13. Úrslitin voru glæsilegur endir á góðu Landsmóti.



Sigurvegurum, þátttakendum, starfsmönnum, sjálfboðaliðum og hestamönnum öllum eru sendar hamingjuóskir með frábært Landsmót. Sjáumst á Gaddstaðaflötum 2028.