Gullmerki LH voru veitt á Uppskeruhátíðinni

Á Uppskeruhátíð LH 2025 var þeim Guðna Halldórssyni og Kristini Skúlasyni veitt Gullmerki LH. Þeir félagar hafa unnið ötullega að framgangi hestamennskunnar á Íslandi markað spor í starfsemi LH og afreksmála í hestaíþróttum.

Landssamband hestamannafélaga þakkar þeim Guðna og Kristni fyrir sitt óeigingjarna starf og óska þeim til hamingju með gullmerkið.

Guðni Halldórsson fyrrv. formaður LH

Guðni Halldórsson hefur alla tíð verið öflugur og metnaðarfullur málsvari hestamennsku á Íslandi. Hann er alinn upp á Mýrum í Borgarfirði og hóf snemma þátttöku í félagsmálum. Á yngri árum sat hann í mótanefnd Faxa og í dómaranefnd HÍDÍ. Árið 2017, eftir nokkurt hlé frá félagsmálum, tók Guðni sæti í landsliðsnefnd LH fyrir hönd Félags hrossabænda og gegndi þar lykilhlutverki í uppbyggingu og faglegri stefnumótun afreksstarfsins.

Á árunum 2020 – 2024 gegndi Guðni starfi formanns Landssambandsins og leiddi samtökin af heilindum og festu. Hann vann ötullega að fjölbreyttum málum á borð við hestavelferð, öryggismál, afreksmál, samvinnu við stjórnvöld og alþjóðasamstarf. Guðni Halldórsson er jarðbundinn leiðtogi sem vinnur af einlægni og eldmóði. Hann er lausnamiðaður og traustur og hefur lagt mikið af mörkum til íslenskrar hestamennsku.

Guðni Halldórsson er vel að gullmerki LH kominn.

Kristinn Skúlason fyrrv. formaður landsliðsnefndar LH

Kristinn Skúlason hefur verið ómetanlegur kraftur í mótahaldi og afreksstarfi innan LH.

Árið 2010 stofnaði hann Gullmótið ásamt góðum félögum í Fáki. Gullmótið hafði það að markmiði að efla reiðfærni, reiðmennsku og samhæfingu. Mótið setti ný viðmið í umgjörð og verðlaunum og vakti mikla athygli fyrir gott skipulag og utanumhald. Kristinn gegndi starfi sem formaður Meistaradeildarinnar á árunum 2011 – 2015 og leiddi þar inn margar nýjungar sem settu keppnina á enn hærri stall. Beinar útsendingar, fagleg dómgæsla, sterkir samstarfsaðilar og margt fleira gerðu það að verkum að deildin blómstraði undir hans stjórn.

Á árunum 2017 - 2025 gegndi Kristinn Skúlason starfi formanns landsliðsnefndar. Þar lagði hann mikla áherslu á fagmennsku, samstöðu og virðingu fyrir hestamennsku sem íþrótt. Kristinn Skúlason er lausnamiðaður, áreiðanlegur og óþreytandi í starfi. Hann hefur lagt hjarta og sál í allt sem hann tekur sér fyrir hendur og á stóran þátt í að efla og lyfta íslenskri hestamennsku á hærra plan.

Kristinn Skúlason er sæmdur gullmerki LH

< Eldri færslur

Nýrri færslur >

Hlaupagæslunámskeið LH og HÍDÍ

14. maí 2026

Miðvikudaginn 20. maí verður haldið námskeið fyrir þá aðila sem hafa hug á að sinna hlaupagæslu í kappreiðum á árinu 2026. Hídí og LH standa að námskeiðinu saman og það er haldið í fjarkennslu á Teams og hefst klukkan 20:00. Samkvæmt reglum um kappreiðar þurfa hlaupagæslumenn í kappreiðaskeiði að vera viðurkenndir af Landssambandi hestamannafélaga og komast þar með á lista yfir viðurkennda hlaupagæslumenn. Farið verður yfir hlutverk og ábyrgð hlaupagæslumanna, helstu reglur kappreiða, siðareglur og fleira ásamt því að skoða skeiðspretti. Dómarar með gild dómararéttindi Gdlh og kynbótadómarar eru samþykktir af LH sem hlaupagæslumenn og þurfa því ekki að taka námskeiðið til þess að vera á listanum. Námskeiðið er ætlað þeim sem hafa brennandi áhuga á kappreiðum og góða þekkingu á gangtegundum. Til þess að taka þátt á námskeiðinu þarf að skrá sig með því að senda tölvupóst á katla@lhhestar.is . Námskeiðið er þátttakendum að kostnaðarlausu.

Menntaráðstefna FEIF og LH 2026

11. maí 2026

Skráning á Menntaráðstefnu FEIF og LH í lok september er í fullum gangi.

Fyrirkomulag sýningargreina á Landsmóti 2026

8. maí 2026

LM2026 í Skagafirði hefur gefið út fyrirkomulag sýningargreina á Landsmóti. Boðið verður upp á B-flokk áhugamanna og A-flokk ungmenna sem sýningargreinar á LM. Hér getur að líta reglur um fyrirkomulag, framkvæmd og þátttökurétt knapa í þessum flokkum á LM2026. Hestamannafélögin þurfa að bjóða upp á þessa flokka í sínum úrtökum til þess að eiga rétt á að senda fulltrúa til keppni í þeim á komandi landsmóti. Að öðru leyti en fram kemur hér fyrir neðan fer val hrossa til þátttöku í þessum flokkum fram í gegnum úrtökur hestamannafélaganna samkvæmt lögum og reglum LH. B-flokkur áhugamanna • Knapar skulu vera í fullorðinsflokki, þ.e. 22 ára eða eldri. • Hestur getur aðeins keppt fyrir eitt félag hvert almanaksár og þarf að vera í eigu félagsmanns í því félagi (Reglur um gæðingakeppni, gr. 3.1.). • Ef skráðir þátttakendur ná ekki 25 þá fellur flokkurinn niður. • Ekki verða teknir inn keppendur af stöðulista í þessum flokki. • Knapi má einungis skrá einn hest til þátttöku í þessum flokki. Sjá nánar í reglugerð um B-flokk áhugamanna . Athugið að úrtaka aðildarfélaga fyrir B-flokk áhugamanna skal fara fram með sérstakri forkeppni líkt og riðin er á Landsmóti. A-flokkur ungmenna • Einungis keppnispör sem ná gildum árangri í úrtöku síns félags, í A-flokki ungmenna eru gjaldgeng til þátttöku í flokknum. • Sérstök forkeppni fer fram í A-flokki ungmenna og milliriðill. A-úrslit verða framkvæmd eins og úrslit í A-flokki. Fari þátttakendafjöldi yfir 50, verða að auki riðin B-úrslit. • Keppendum í barna- og unglingaflokki er heimil þátttaka í þessum flokki (Reglur um gæðingakepni, gr. 7.4.4.). • Ef skráðir þátttakendur ná ekki 25 þá fellur flokkurinn niður. • Ekki verða teknir inn keppendur af stöðulista í þessum flokki. • Knapi má einungis skrá einn hest til þátttöku í þessum flokki. Þátttökuréttur í þessum flokkum miðast við fjölda félagsmanna sem skráðir eru í félagatali hestamannafélaga LH þann 15. apríl 2026. Aðildarfélög mega senda 1 keppanda fyrir hverja 250 félaga og svo framvegis.

Katla Gísladóttir nýr starfsmaður á skrifstofu LH

1. maí 2026

Katla Gísladóttir hefur verið ráðin til starfa á skrifstofu LH. Katla mun gegna 60% starfshlutfalli og verður starfsmaður mótamála hjá LH, starfar með keppnisnefnd og fleiri nefndum ásamt því að sjá um vefmiðla LH og fleiri verkefni. Katla hefur stundað hestamennsku frá unga aldri og hefur fjölbreyttan bakgrunn í hestamennsku, er alin upp við hestatengda ferðaþjónustu þar sem jafnframt var stunduð hrossarækt og tamningar. Hún hefur lokið reiðkennaraprófi frá Háskólanum á Hólum og keppti mikið á hestum í yngri flokkum. Í dag stundar hún hestamennsku með fjölskyldunni sinni á svæði Hestamannafélagsins Spretts. Katla hefur lokið BS í umhverfis- og byggingarverkfræði frá Háskóla Íslands og hefur unnið við hönnun og ráðgjöf varðandi brunavarnir og öryggismál sl. 10 ár. Katla gegndi stöðu varaformanns Hestamannafélagsins Spretts frá 2024 – 2026. Hún hefur unnið mikið að sjálfboðaliðastörfum tengt starfi hestamannafélaga, fyrst í Geysi en síðar í Sörla og Spretti og hefur mjög mikla reynslu af mótahaldi hestamannafélaga, rekstri, framkvæmd og regluverki móta. „Ég hef mikinn áhuga á þessu starfi þar sem ég brenn fyrir málefnum hestamanna. Ég hef góða reynslu á mörgum hliðum hestamennskunnar, keppnisreglum og mótahaldi. Ég tel að reynsla mín bæði í starfi og í sjálfboðaliðaverkefnum muni nýtast vel í starfinu og hlakka til að starfa með hestafólki um allt land.“ Katla er boðin hjartanlega velkominn til starfa. Aðrir starfsmenn skrifstofu LH eru Berglind Karlsdóttir framkvæmdastjóri og Hinrik Þór Sigurðsson afreksstjóri. Þær breytingar hafa orðið á starfsmannahaldi LH að Hinrik hefur minnkað starfshlutfall sitt á skrifstofunni niður í 50% og mun eingöngu gegna starfi afreksstjóra en hann hefur einnig starfað við mótamálin.