Áskell Heiðar ráðinn framkvæmdastjóri Landsmóts hestamanna á Hólum 2026

Áskell Heiðar er menntaður landfræðingur frá Háskóla Íslands, með diplómu í opinberri stjórnsýslu frá HÍ og MA gráðu í ferðamálafræði og viðburðastjórnun frá Háskólanum á Hólum og Leeds Beckett University. Auk áðurnefndra Landsmóta hefur hann skipulagt fjölda viðburða hérlendis á undanförnum árum eins og tónlistarhátíðina Bræðsluna sem mun fagna tuttugu ára afmæli í sumar. Áskell Heiðar er lektor við Ferðamáladeild Háskólans á Hólum þar sem hann kennir viðburðastjórnun. Hann mun halda því áfram samhliða skipulagningu Landsmóts.

Skagfirðingur hefur stofnað sérstakt félag sem mun annast rekstur mótsins og þá hefur verið skipuð sérstök framkvæmdanefnd LM26 sem hittist í fyrsta skiptið á Hólum í dag. Í henni sitja; Elvar Einarsson, formaður, Stefanía Inga Sigurðardóttir, gjaldkeri, Bjarni Jónasson, Hallgrímur Ingi Jónsson og Arna Björg Bjarnadóttir frá hestamannafélaginu Skagfirðingi, Hjörtur Bergstað frá Landsambandi hestamanna og Sigfús Ingi Sigfússon og Hjörvar Halldórsson frá sveitarfélaginu Skagafirði.

Búist er við miklum fjölda gesta á landsmótið sem fram fer í júlí 2026. Undirbúningur er þegar hafinn og Elvar Einarsson formaður hestamannafélagsins Skagfirðings segist viss um að mótið verði lyftistöng fyrir hestamennsku á landinu. Áskell Heiðar segir framkvæmdanefndina búa að því að mikil þekking varðandi hestamannamót sé til í Skagafirði og nágrannabyggðum, ekki síst eftir síðasta landsmót á Hólum 2016. Þá hafi verið byggð upp glæsileg aðstaða sem muni nýtast aftur, en auðvitað þurfi að gera einhverjar lagfæringar á bæði völlum og annarri aðstöðu. „Landsmót er mjög skemmtilegt samvinnuverkefni þar sem mjög margir leggja hönd á plóg og það verður mitt stærsta verkefni á næstu mánuðum að virkja þennan mannauð og tryggja það að mótið verði vel heppnaður viðburður þar sem áherslan verður auðvitað á frábæra hesta, en einnig á að fólk hittist og eigi saman góðar stundir“ segir Áskell Heiðar.

< Eldri færslur

Nýrri færslur >

Yfirliti lokið í flokki sjö vetra hrossa

8. ágúst 2025

Niðurstöður úr kynbótasýningum sjö vetra og eldri hrossa

Skin og skúrir í forkeppni í fjórgangi

8. ágúst 2025

Forkeppni í fjórgangi er nú lokið. Ísland átt fimm fulltrúa, þrjá í fullorðinsflokki þau Helgu Unu Björnsdóttur og Ósk frá Stað, Aðalheiði Önnu Guðjónsdóttur og Hulinn frá Breiðstöðum og Jóhönnu Margréti Snorradóttur og Össu frá Miðhúsum. Í ungmennaflokk kepptu fyrir Íslands hönd þau Herdís Björg Jóhannsdóttir og Kormákur frá Kvistum og Védís Huld Sigurðardóttir og Ísak frá Þjórsárbakka. Herdís og Kormákur riðu á vaðið fyrir hönd íslensku keppendanna en lukkan var ekki í liði með þeim í dag því Kormáki fipaðist á yfirferðinni og útkoman var 5,87. Næst í braut af íslensku keppendunum komu þau Védís Huld Sigurðardóttir og Ísak frá Þjórsárbakka en þau voru í feikna stuði og hlutu í einkunn 7,07 og eru önnur inn A-úrslit ungmenna. Þriðjar í braut íslensku keppendanna voru þær Helga Una Björnsdóttir og Ósk frá Stað með stórglæsilega sýningu sem skilaði þeim 7,47 og beint inn í A-úrslit. Fjórðu í braut af íslensku keppendunum voru síðan Aðalheiður Anna Guðjónsdóttir og Hulinn frá Breiðstöðum en því miður missti Hulinn skeifu og þau hlutu ekki einkunn. Fimmtu í braut komu loks Jóhanna Margrét Snorradóttir og Assa frá Miðhúsum og enduðu þær með 7,07 og lönduðu þar með sæti í B-úrlitum. Af íslensku knöpunum eigum við því í fullorðinsflokki einn í A-úrslitum og einn í B-úrslitum, og í ungmennaflokki er einn í A-úrslitum. Anne Stine Haugen og Hæmir frá Hyldsbæk leiða fullorðinsflokkinn með yfirburðum en þau hlutu hvorki meira né minna en 8,20 fyrir sína mögnuðu sýningu en þau keppa fyrir hönd Noregs. Eiðfaxi hitti Anne Stine eftir þeirra sýnungu sem sjá má á fréttasíðu Eiðfaxa en hjá Eiðfaxa er að finna fjölmörg stórskemmtileg viðtöl við knapa að loknum sýningum sem og gesti og gangandi. Næst á dagskrá er yfirlit fyrir 7 vetra og eldri hryssur og stóðhesta. Þar eigum við tvo fulltrúa þau Eind frá Grafarkoti, sýnandi Bjarni Jónasson og Hljóm frá Auðsholtshjáleigu, sýnandi Árni Björn Pálsson. Eind hlaut 8,41 í fordómi og var þriðja hæst í sínum flokki. Hljómur frá Auðsholtshjáleigu var hæstur í sínum flokki eftir fordóm með 8,77 í aðaleinkunn. Það verður því einkar spennandi að fygjast með þeim á eftir. Í kvöld fara svo fram seinni tveir sprettirnir í 250m skeiði. Þar eigum við fimm fulltrúa og sem stendur eiga þau Kristján Árni Birgisson og Krafla frá Syðri-Rauðalæk besta tímann í ungmennaflokk en þau hlupu á tímanum 22,38 sek. Í fullorðinsflokki eiga þeir Sigursteinn Sumarliðason og Krókus frá Dalbæ annan besta tímann eða 21,97 sek. Það verður því spennandi að sjá hvernig þeim og restinni af íslenska hópnum gengur í kvöld.