Auglýst er eftir umsóknum í Hæfileikamótun LH
12. október 2022
LH auglýsir eftir umsóknum í Hæfileikamótun LH veturinn 2022/2023, fyrir 14-17 ára (unglingaflokkur).
Í Hæfileikamótun LH 2022-2023 verður lögð áhersla á að höfða til metnaðarfullra afreksknapa framtíðarinnar sem m.a. stefna á að keppa fyrir Íslands hönd í framtíðinni. Hæfileikamótun LH er því ein af leiðunum inn í U21 landsliðshóp LH og gefur einnig möguleika á að taka þátt í verkefnum á vegum landsliðsins.
Drög að dagskrá vetrarins er eftirfarandi:
- Heimsókn að Hólum um mánaðarmótin nóvember/desember - Metnaðarfull námshelgi með reiðtímum á skólahestum Hólaskóla ásamt sýnikennslu og fyrirlestrum frá reiðkennurum Hólaskóla og öðru fagfólki.
- Tvær stórar kennsluhelgar eftir áramót þar sem allur hópurinn kemur saman á einum stað með sína keppnishesta. - Reiðkennsla, sýnikennsla og fyrirlestrar. Hópurinn kemur saman á föstudegi og er gist í tvær nætur. Hesthúspláss á staðnum.
- Kennsla á keppnisvelli - Einn reiðtími í upphafi keppnistímabils utanhúss.
- Lokahittingur í maí/júní þar sem allir hittast í hópefli og fræðslu
- Þátttaka í viðburðum á vegum landsliðsnefndar og landsliðhópa LH.
Yfirkennari er Sigvaldi Lárus Guðmundsson sem mun kenna öllum hópum ásamt aðstoðarkennurum hverju sinni.
Við val inn í Hæfileikamótun ár hvert er stuðst við nokkur atriði:
- Keppnisárangur sl. tveggja ára er metinn og horft til þátttöku á stærri mótum (t.d. Íslandsmót, Landsmót og Reykjavíkurmót)
- Þátttaka í Hæfileikamótun fyrri ára, hafi kanpar tekið þátt áður (t.d. ástundun, áhugi og framfarir)
- Áhugi og dugnaður í hestamennsku – framtíðarknapar Íslands (áhugasamir og efnilegir knapar sem eiga framtíðina fyrir sér)
Þátttökugjald er kr. 75.000. Innifalið er:
- Reiðkennsla – þrjár kennsluhelgar og dagur úti á velli
- Rúta og gisting ásamt fæði á Hólum í Hjaltadal
- Tvær gistinætur hverja kennsluhelgi, ásamt fæði og hesthúsaplássi
- Fyrirlestrar og sýnikennsla á kennsluhelgum
- Dagsferð að vori, hópefli og fræðsla
- Merktur jakki frá TopReiter
Umsóknarfrestur er 25. október 2022
Fréttasafn

2. nóvember 2026
Að loknu hverju landsþingi skipar stjórn Landssambands hestamannafélaga í nefndir sambandsins til tveggja ára. Nefndarstörf eru undirstaðan í öllu starfi LH og mikilvægt að fá öfluga sjálfboðaliða sem eru tilbúnir að leggja sitt af mörkum. Nefndastarf á vegum LH er skemmtilegt og fræðandi, auk þess sem störf í nefndum eru gefandi og til þess fallin að efla tengslanet nefndafólks. Ef þú ert tilbúin/n til að starfa í nefnd hjá LH þá sækir þú um á sértöku umsóknareyðublaði . Frestur til að gefa kost á sér í nefndastörf LH er 20. nóvember. Nefndirnar sem um ræðir eru: Keppnisnefnd Keppnisnefnd fjallar um mál sem stjórn LH vísar til hennar en hefur að öðru leyti frumkvæðisrétt að málefnum sem undir hana heyra. Hlutverk nefndarinnar er að bæta reglur er viðkoma keppni í hestamennsku, þannig að þær séu einfaldar, skiljanlegar og skýrar. Laganefnd Hlutverk nefndarinnar er að að bæta regluverk LH, þannig að það sé einfalt, skiljanlegt og skýrt og vera stjórn til ráðgjafar er varðar túlkun á lögum og reglum LH. Nefndin sér einnig um að breytingar á lögum og reglum sem samþykktar eru á FEIF-þingi og landsþingi LH séu rétt færð inn í lög og reglur LH og fara yfir tillögur til landsþings. Landsliðs- og afreksnefnd Hlutverk landsliðs- og afreksnefndar er að móta umgjörð um afreksmál LH og halda utan um landsliðshópa og hæfileikamótun LH. Nefndin er einnig fjáröflunarnefnd fyrir afreksstarf LH. Nefndin skipuleggur landsliðsferðir og fylgir eftir landsliðum Íslands í hestaíþróttum á HM og NM. Mannvirkjanefnd Hlutverk nefndarinnar er að vera ráðgefandi varðandi gerð og notkun mannvirkja á hestaíþróttasvæðum hestamannafélaganna. Einnig ber nefndinni að vera stjórn innan handar varðandi lágmarkskröfur sem gerðar eru til mótshaldara Íslandsmóta og Landsmóta hvað varðar aðstæður á mótssvæði. Menntanefnd Hlutverk nefndarinnar er að vera sérfræðilegur ráðunautur sambandsstjórnar LH í öllum málefnum er varða fræðslu og menntun. Nefndin heldur utan um endurmenntunarnámskeið fyrir reiðkennara og staðfestir virka reiðkennara til FEIF. Annað hvert ár stendur nefndin fyrir endurmenntunarráðstefnu. Tölvunefnd Hlutverk nefndarinnar er að tryggja aðgengi aðildarfélaga LH að framúrskarandi forriti sem reiknar út niðurstöður móta og birtir niðurstöður á aðgengilegan hátt. Nefndin stuðlar að þróun mótaforrits í samræmi við kröfur samtímans. Úrskurðar- og aganefnd Úrskurðar- og aganefnd LH skal skipuð þremur aðalmönnum og tveimur til vara, formaður skal vera löglærður. Úrskurðar- og aganefnd úrskurðar um brot á lögum, reglugerðum og reglum LH og ákvarðar viðurlög, í samræmi við reglur Úrskurðar- og aganefndar. Æskulýðsnefnd Hlutverk Æskulýðsnefndar er að efla fræðslu um æskulýðsmál, gæta hagsmuna og jafnræðis æskunnar í íþróttinni, auka fræðslu æskulýðsfulltrúa um allt land og styðja við þá í starfi. Nefndin sér einnig um val þátttakenda á FEIF Youth Cup og Youth Camp. Útbreiðslu- og nýliðunarnefnd Hlutverk nefndarinnar er að vinna að útbreiðslu og kynningu á hestaíþróttum og stuðla að jákvæðri ímynd hestaíþrótta. Nefndinni er einnig ætlað að vinna að aukinni útbreiðslu og umfjöllun um hestaíþróttir. Öryggisnefnd Hlutverk nefndarinnar er að vera vakandi yfir því sem varðar öryggi hestafólks hvort sem er í búnaði hestafólks eða umhverfi hestaíþrótta. Nefndin stuðlar að öryggi á reiðvegum og annars staðar þar sem hestamennska er stunduð og sér um að fræða hinn almenna hestamann um hvernig hægt er að bæta öryggi í nærumhverfi. Ef þú ert tilbúin til að starfa í nefnd hjá LH þá sækir þú um með því að smella hér .


















