Kosning um LH félaga ársins

Hestamannafélagið Fákur tilnefndir til félaga ársins 2023 Sæmund Ólafsson. Sæmundur hefur í mörg ár staðið vaktina við alla helstu viðburði og mót í Fáki. Hann er ávallt boðinn og búinn til að aðstoða, hvort sem það er við undirbúning eða vinnu á viðburðunum sjálfum. Sæmundur er nefndarmaður í mótanefnd Fáks en sú nefnd heldur meðal annars Reykjavíkurmeistaramót sem er stærsti hestaviðburður í Íslandshestamennskunni þau ár sem ekki er Landsmót.

Christina Niewert eða Tína eins og hún er jafnan kölluð er sannur Hringsfélagi. Hún starfar sem reiðkennari hjá Hring en hún er ekki bara venjulegur reiðkennari því hún brennur fyrir að virkja alla sem hafa minnsta snefil af áhuga á hestum og leggur mikla áherslu á að allir sem vilja, geta fengið tækifæri til að kynnast íslenska hestinum, sérstaklega ef aðstæður viðkomandi eru erfiðar. Eins og hjá börnum sem ekki hafa aðgang að hestum og nýbúum. Þannig berst hún með sína reiðhesta í Hringsholt í reiðkennslu til að börn og ungmenni sem ekki hafa aðgang að hestum geti stundað reiðnámekið hjá Hring. Hún vill gera hestamennsku aðgengilega fyrir alla, börn, hræddar konur og nýbúa.

Tína er hugmyndaríkur frumkvöðull og fær oft góðar hugmyndir sem hún er líka dugleg að framkvæma. Sem dæmi má nefna konuhittingar, prikhestanámskeið, allskonar reiðtúrar með hringsfélögum á öllum aldri og öllum getustigum. Þá á hún sennilega metið í ferðum á hestbaki upp að Skeiðsvatn hér í Svarfaðardal og býður ávallt einhverjum með sér. Hún lætur fátt aftra sér í sinni hestamennsku og eru útsjónasemi, dugnaður og þrautseiga orð sem lýsa henni Tínu einna best.

Tina er alltaf boðin og búin til að taka þátt í hverju því starfi sem þarf, sérstaklega ef það snýr að börnum og unglingum og hefur hún verið í æskulýðsnefnd Hrings til margra ára og er hún einn traustasti nefndarfulltrúinn þeirrar nefndar, mætir á alla fundi og tekur þátt í öllum viðburðum hjá æskulýðsnefndinni. Auk þess að starfa með æskulýðsnefndinni í Hring er Tína óþreytandi stuðningur við hverja þá konu sem einhverra hluta vegna hefur misst kjarkinn gagnvart hestum eða hestamennsku og hefur hún aðstoðað margar konur við að komast aftur af stað í hestamennsku sinni.

Síðastliðinn vetur fór stjórn Neista af stað með félagshesthús þar sem þátttakendum á námskeiðum á vegum félagsins bauðst að leigja stíur fyrir sína hesta á kostnaðarverði. Einnig buðum við upp á að leigja hesta fyrir þá sem eiga ekki hesta en vildu vera á námskeiðum hjá okkur í vetur. Aðsóknin var vonum framar og færri komust að en vildu. En til að hægt sé að bjóða upp á slíka þjónustu þarf einhver að halda utan um skipulagið og sá Selma alfarið um það. Hún var vakin og sofin yfir þessu verkefni, sá um að setja hestana út og moka og gefa eftir þörfum auk þess sem hún sá um að halda utan um og fá aðra með sér í lið við þessi verk.

Heiðrún Ósk er "JÁ" manneskjan okkar & hefur ekki verið þekkt fyrir að hafa nei í sínum orðaforða. Hún er alltaf boðin og búin til að aðstoða hvar sem þess gerist þörf. Hún er einn af drifkröftum Æskulýðsstarfins í skipulagi og framkvæmd þar sem hún fer fyrir nefndinni og heldur utan um ungana okkar. Einnig er hún mjög dugleg og drífandi við að standa vaktirnar í sjoppunni við fjáröflunar starfið. “Já þetta gerist ekki af sjálfum sér” segir hún stundum. Hún hefur einnig séð um útleigu og þrif á Tjarnabæ, félagshúsinu okkar og hefur gert það með miklum sóma ásamt mörgu öðru sem hún tekur sér fyrir hendur.

< Eldri færslur

Nýrri færslur >

Jólakveðja frá formanni LH

24. desember 2025

Jóla- og nýárskveðja frá formanni LH

Jólakveðja

22. desember 2025

Landssamband hestamannafélaga óskar öllum hestamönnum nær og fjær gleðilegra jóla og farsældar á nýju ári, með kærri þökk fyrir samstarfið á árinu. Starfsfólk og stjórn LH

Reiðkennari ársins 2025 Hekla Katharína

Eftir Berglind Karlsdóttir • 18. desember 2025

Hekla Katharína Kristinsdóttir er reiðkennari ársins 2025

Nýr landsliðsþjálfari A-landsliðsins í hestaíþróttum

9. desember 2025

Ísólfur Líndal Þórisson hefur verið ráðinn landsliðsþjálfari A-landsliðs Íslands í hestaíþróttum

Takk sjálfboðaliðar!

5. desember 2025

Alþjóðlegur dagur sjálboðaliða 5. desember

Góðar og uppbyggilegar umræður á formannafundi LH

14. nóvember 2025

Form annafundur LH var haldinn laugardaginn 8. nóvember sl. Fundinn sóttu um áttatíu manns frá þrjátíu hestamannafélögum auk fulltrúa frá fastanefndum LH, dómarafélögunum og stjórn LH. Góðar og uppbyggilegar umræður urðu á fundinum sem stjórn LH tekur með sér í næsta starfsár og í undirbúning fyrir Landsþing 2026. Formaður LH, Linda Björk Gunnlaugsdóttir, fór í ræðu sinni yfir þau mál sem hafa verið fyrirferðarmest í starfsemi LH á árinu ásamt því að tæpa á helstu verkefnum sem framundan eru. Það eru mörg og umfangsmikil verkefni á borði stjórnar hverju sinni og hefur mikill tími farið fyrsta starfsárið hjá nýrri stjórn í að endurskipuleggja og hagræða í rekstri sambandsins. Afreksmálin eru alltaf fyrirferðarmikil á HM ári í verkefnum skrifstofu og stjórnar og eru afreksmálin á ákveðnum tímamótum núna þar sem samningar við landsliðsþjálfara eru lausir. Gjaldkeri LH, Ólafur Gunnarsson, fór yfir stöðu reikninga og uppfærðar fjárhagsáætlanir sem gera ráð fyrir á næstu tvö ár skili hagnaði en eins og áður kom fram hefur verið farið í hagræðingaraðgerðir á árinu í þeim tilgangi að snúa rekstri sambandsins til betri vegar. Starfshópar sem skipaðir voru skv. samþykkt landsþings 2024 kynntu sína vinnu frá landsþingi. Starfshópur um Íslandsmót telur ekki þörf á að gera breytingar á keppnishluta mótsins en leita þurfi leiða til að gera viðburðinn Íslandsmót að stærri viðburði fyrir áhorfendur. Starfshópur um innanhússmót lagði fram tillögu fyrir fundinn um haldið yrði 2ja til 3ja daga Íslandsmót innanhúss í lok innanhússkeppnistímabilsins 2026 til reynslu. Fundurinn vísaði tillögunni til stjórnar til nánari útfærslu og mun stjórn kalla til framhaldsfundar formanna til frekari umræðna. Æskulýðsbikar LH hlaut Hestamannafélagið Skagfirðingur og veittu yfirreiðkennari félagsins og formaður æskulýðsdeildar Skagfirðings bikarnum móttöku. Fulltrúar frá hestamannafélögunum Mána, Hring, Funa, Herði, Freyfaxa og Sleipni sögðu frá sínum verkefnum og helstu áskorunum. Voru það virkilega áhugaverðar frásagnir því flest hestamannafélög eru að eiga við svipaðar áskoranir þó aðstæður hjá hverju félagi séu mismunandi. Að loknum hefðbundnum fundarstörfum var fundinum skipt upp í þrjá umræðuhópa sem fjölluðu um stefnumótun, gjaldkerastörf og nýliðunar -og æskulýðsmál. Mikil umræða og góð vinna var í umræðuhópunum. Í hópnum um stefnumótum urðu mjög líflegar umræður og margir snertifletir ræddir á hinum ýmsu málum og ljóst að það er heilmikið að vinna úr í framhaldinu. Fundinum var skipt upp í sex minni hópa sem fjölluðu hver um sig um ákveðna þætti í starfsemi LH, hvaða markmið skuli setja og hvernig skuli ná þeim. Stefnumótunarfundurinn var framhald af opnum stefnumótunarfundi sem haldinn var sl. vor með fulltrúum hestamannafélaganna. Hópurinn um æskulýðs- og nýliðunarmál fjallaði um þátttöku stráka í hestamennsku, félagshesthús og almenna stöðu hjá félögunum. Margar hugmyndir komu upp og góðar umræður sköpuðust. Í gjaldkerahópnum var rætt um samskipti við sveitarfélög, fjármál hestamannafélaga, félög í almannaheilaskráningu og fyrirmyndafélög ásamt styrkjum til hestamannafélaga. Fjármál hestamannafélaganna eru almennt í góðum málum og faglega staðið að þeim en slíkt er algjör forsenda fyrir því að gott samtal geti átt sér stað við sveitarfélögin þegar kemur að styrkjamálum hins opinbera. Félögin voru einnig hvött til að skrá félagið á almannaheillaskrá en það er gott verkfæri þegar leitað er styrkja hjá almennum fyrirtækjum og veitir skattaafslátt á móti. Einnig voru félögin hvött til að hefju vinnu við að gerast fyrirmyndarfélag ÍSÍ og er það holl og góð vinna til að bæta starfshætti félagsins. Félög geta leitað til hvors annars um þau gögn sem þarf að skila og voru félögin hvött til að vinna þau saman. Samhliða formannafundi var haldinn mótanefndafundur sem um tuttugu manns sátu, en fyrirhugað er að halda framahaldsmótanefndafund um næstu mánaðamót til að ræða frekar mótadagskrá ársins. Stjórn LH þakkar formönnum hestamannafélaga í landinu og öðrum þátttakendum á formannafundi fyrir afar uppbyggilegar umræður sem munu nýtast vel á komandi starfsári. Skýrsla stjórnar LH 2024-2025