Met skráninga á WR íþróttamót Geysis sem fram fer um helgina hefur vakið verðskuldaða athygli. Mótið átti upphaflega að vera þriggja daga mót en sökum mikillar skráningar hófst mótið kl. 10 í gær, fimmtudag og stendur fram á mánudagskvöld. Að baki móti eins og þessu liggur mikil vinna sjálfboðaliða. Við heyrðum í Eiríki Vilhelm Sigurðarsyni formanni Geysis sem sagði okkur örlítið frá mótinu og undirbúningnum.

Stefnduð þið alltaf á svona stórt mót?

„Nei við gerðum það í rauninni ekki, mótið átti að vera þrír dagar en við þurftum að bæta tveimur dögum við. Það eru 550 skráðir sem er töluvert meira en við áttum von á, en í fyrra voru um 300 skráningar svo þetta er töluverð stækkun á milli ára.“

Hversu mikil vinna hefur farið í undirbúninginn?

„Mótsstjórn sat við mörg kvöld, það fer alveg rosalegur tími í þetta en verkefnið er skemmtilegt og félagsskapurinn er góður. Allir sem koma að þessari framkvæmd eru sjálfboðaliðar og eru að skipuleggja þetta í frítíma sínum. Auðvitað er maður fyrst og fremst þakklátur fyrir það hvað hestafólk er tilbúið að leggja á sig mikla vinnu til að mótin megi verða að veruleika.“

Hvernig hefur mótið farið af stað, hefur veðrið sett strik í reikninginn?

„Mótið hefur farið vel af stað, spáin var ekki glæsileg en við vonum að vindurinn flýti sér hægt. Það er rigning og vindur en völlurinn heldur vel enda erum við búin að passa vel upp á hann. Stemningin er góð og Alendis munu sýna frá meistara- og ungmennaflokkum.“

Hver er helsta áskorunin við að halda svona mót?

„Aðal áskorunin er að raða niður á dagana og þar erum við heppin að vera með ákaflega reynslumikið fólk í mótsstjórn og í félaginu sem kann og getur áætlað tímana svo dagskráin gangi upp. Þetta er fimm daga mót við byrjuðum kl. 10 á fimmtudagsmorgun og verðum fram á mánudagskvöld, svo auðvitað er þetta mikið skipulag.“

Hvað koma margir starfsmenn og sjálfboðaliðar að framkvæmdinni?

Það koma 40 sjálfboðaliðar að framkvæmdinni og á hverjum tíma gerum við ráð fyrir því að það séu um 20 starfsmenn við vinnu. Öll vinna á mótinu fyrir utan dómarastörf eru unnin í sjálfboðavinnu. Í heildina reiknast mér til að sjálfboðaliðarnir okkar séu að skila um 650 klukkustundum í vinnu um helgina fyrir utan allan undirbúninginn. Það væri auðvitað ekki hægt að halda svona stórt og flott mót nema með því góða fólki sem leggur hendur á plóg. Vinnan dreifist á marga og það hefur verið gaman að undirbúa mótið og upplifa hversu jákvæðir félagsmenn eru fyrir því að koma og starfa með okkur.“

„Það spáir vel fyrir morgundaginn, svo við vonum auðvitað að sem flestir komi til okkar og kíki á mótið.“