Þvílíkur loka dagur!

Það má sko með sanni segja að loftið hafi verið rafmagnað hér í Orischot í morgun þegar úrslit í T2 fóru fram þar áttum við ekki fulltrúa, en Íslendingarnir í stúkunni fönguðu þó ákaft þegar Máni Hilmarsson sem keppir fyrir hönd Svíþjóðar á hestinum Gljátoppi frá Miðhrauni sigraði með 8,75 í einkunn. Heimsmeistari ungmenna varð Lena Becker á Bikar frá Ytra-Vallholti með 7,46 í einkunn. Að loknum úrslitum í T2 var komið að ungmennaflokki í fjórgangi. Þar áttum við frábæra fulltrúa Jón Ársæl og Frá. Þeir voru með yfirburðasýningu og hlutu 7,50 í einkunn og hömpuðu þar með sýnum öðrum heimsmeistaratitli!

Fjórgangur fullorðinna var næstur á dagskrá, úrslitin voru gífurlega sterk og frábærir fulltrúar þangað mættir. Fyrir keppnina var ljóst að keppnin milli Jóhönnu, Frauke Schenzel og Christinu Lund yrði jöfn. Þær buðu allar upp á stórsýningu og spennan var ólýsanleg. Aðeins munaði 0,03 á fyrsta og öðru sæti sem kom í hlut Jóhönnu og Bárðar sem hlutu einkunnina 8,00 en Frauke hampaði heimsmeistara titlinum á Jódísi vom Kronshof með 8,03. Viðar og Þór áttu á köflum góða sýningu en enduðu í 7. sæti í fjórgangi.

Þá var komið að úrslitum í fimmgangi fullorðinna. Fyrir úrslitin var það mál manna að hér færu fram einhver sterkustu fimmgangs úrslit seinni ára, það virtist þó ekki trufla Söru og Flóka sem komu inn í sýninguna með léttleika og stemningu og það var einhvern veginn skrifað í skýin að þau myndu taka þetta þrátt fyrir að Máni Hilmarsson hafi leitt keppnina í upphafi. Þorgeir og Goðasteinn komu einnig mjög sannfærandi til leiks en voru því miður dæmdir úr keppi eftir dýralæknaskoðun að keppni lokinni. Sara og Flóki hlutu 7,90 og áttu heilt yfir mjög jafna góða sýningu og eru vel að heimsmeistaratitlinum komin. Það er gaman að segja fá því að faðir hennar, Sigurbjörn Bárðarson vann einmitt fimmganginn á HM í Hollandi fyrir 30 árum síðan.

Eftir þessa stórsýningu var komið að því að kynna hæstdæmdu stóðhesta mótsins. Þar áttum við þrjá fulltrúa. Höfði frá Bergi, sýnandi Þorgeir, var efstur fimm vetra stóðhesta og þar með heimsmeistari með aðaleinkunnina 8,39. Geisli frá Árbæ, sýnandi Árni Björn hlaut 8,60 og endaði efstur sex vetra stóðhesta og þar með heimsmeistari. Í flokki 7 vetra og eldri stóðhesta var okkar fulltrúi Hersir frá Húsavík, sýnandi Teitur hlutu 8,60 í aðaleinkunn og enduðu þar með næstefstir og tóku silfurverðlaun.

Eftir því sem leið á daginn jókst stemningin og eftirvæntingin eftir tölt T1 úrslitunum, að venju hófst keppnin á ungmennaflokki þar sem okkar fulltrúar þau Herdís Björg og Jón Ársæll voru hlutskörpust í forkeppninni. Eftir fyrstu grein leiddi Jón Ársæll, en þá var eins og kveikt hefði verið á Herdísi og hún og Kvarði skildu alla eftir í reiknum, þvílík sýning hjá þessu pari sem sökum ungs aldurs rétt ná inn á heimsmeistaramót. Þau enduðu með 7,22 í einkunn og þar með efst ungmenna og heimsmeistarar í tölti T1! Jóni Ársæli og Frá fipaðist aðeins þegar teip losnaði á fæti Frá í miðri sýningu og dró það þá töluvert niður en þrátt fyrir það hömpuðu þeir fimmta sætinu.

Lokakeppni mótsins var svo tölt T1 í fullorðinsflokki. Stúkurnar voru algjörlega smekkfullar og eftirvæntingin áþreifanleg. Okkar fulltrúar voru þau Jóhanna Margrét og Bárður og Viðar og Þór. Fyrir keppnina voru þær Jóhanna og Sys Pilegaard á Abel fra Tyrevoldsdal taldar sigurstranglegastar og þær voru báðar með stórsýningu. Jóhanna og Bárður voru þó beittari og með yfirburða útgeislun og áttu svo sannarlega skilið að sigra með einkunnina 8,94. Þvílíkur árangur hjá þessu fallega pari og ákaflega gleðilegt að sjá Jóhönnu lyfta tölthorninu fyrir fram hátt í 12.000 manns.

Samtals hlaut íslenski hópurinn 16 gullverðlaun og þrjú silfur. Þar af fimm gull og eitt silfur á kynbótabrautinni, en alls 11 gull og þrjú silfur í íþróttakeppninni. Allir keppendur okkar í ungmenna flokki komust á pall. Árangur þessa móts er einhver sá besti sem liði hefur náð frá upphafi. Það er mál manna að samheldnin og liðsandinn hafi líka sjaldan verið eins góður og vakti það eftirtekt og umræður hér í Orischot hversu samheldinn og öflugur Íslenski hópurinn var meðal annara liða og starfsmanna. Landsliðsþjálfararnir og landsliðsnefnd og eiga stórt hrós skilið fyrir alla eljuna sem þau hafa sett í undirbúning og utanumhald fyrir þetta mót!

< Eldri færslur

Nýrri færslur >

Jólakveðja frá formanni LH

24. desember 2025

Jóla- og nýárskveðja frá formanni LH

Jólakveðja

22. desember 2025

Landssamband hestamannafélaga óskar öllum hestamönnum nær og fjær gleðilegra jóla og farsældar á nýju ári, með kærri þökk fyrir samstarfið á árinu. Starfsfólk og stjórn LH

Reiðkennari ársins 2025 Hekla Katharína

Eftir Berglind Karlsdóttir • 18. desember 2025

Hekla Katharína Kristinsdóttir er reiðkennari ársins 2025

Nýr landsliðsþjálfari A-landsliðsins í hestaíþróttum

9. desember 2025

Ísólfur Líndal Þórisson hefur verið ráðinn landsliðsþjálfari A-landsliðs Íslands í hestaíþróttum

Takk sjálfboðaliðar!

5. desember 2025

Alþjóðlegur dagur sjálboðaliða 5. desember

Góðar og uppbyggilegar umræður á formannafundi LH

14. nóvember 2025

Form annafundur LH var haldinn laugardaginn 8. nóvember sl. Fundinn sóttu um áttatíu manns frá þrjátíu hestamannafélögum auk fulltrúa frá fastanefndum LH, dómarafélögunum og stjórn LH. Góðar og uppbyggilegar umræður urðu á fundinum sem stjórn LH tekur með sér í næsta starfsár og í undirbúning fyrir Landsþing 2026. Formaður LH, Linda Björk Gunnlaugsdóttir, fór í ræðu sinni yfir þau mál sem hafa verið fyrirferðarmest í starfsemi LH á árinu ásamt því að tæpa á helstu verkefnum sem framundan eru. Það eru mörg og umfangsmikil verkefni á borði stjórnar hverju sinni og hefur mikill tími farið fyrsta starfsárið hjá nýrri stjórn í að endurskipuleggja og hagræða í rekstri sambandsins. Afreksmálin eru alltaf fyrirferðarmikil á HM ári í verkefnum skrifstofu og stjórnar og eru afreksmálin á ákveðnum tímamótum núna þar sem samningar við landsliðsþjálfara eru lausir. Gjaldkeri LH, Ólafur Gunnarsson, fór yfir stöðu reikninga og uppfærðar fjárhagsáætlanir sem gera ráð fyrir á næstu tvö ár skili hagnaði en eins og áður kom fram hefur verið farið í hagræðingaraðgerðir á árinu í þeim tilgangi að snúa rekstri sambandsins til betri vegar. Starfshópar sem skipaðir voru skv. samþykkt landsþings 2024 kynntu sína vinnu frá landsþingi. Starfshópur um Íslandsmót telur ekki þörf á að gera breytingar á keppnishluta mótsins en leita þurfi leiða til að gera viðburðinn Íslandsmót að stærri viðburði fyrir áhorfendur. Starfshópur um innanhússmót lagði fram tillögu fyrir fundinn um haldið yrði 2ja til 3ja daga Íslandsmót innanhúss í lok innanhússkeppnistímabilsins 2026 til reynslu. Fundurinn vísaði tillögunni til stjórnar til nánari útfærslu og mun stjórn kalla til framhaldsfundar formanna til frekari umræðna. Æskulýðsbikar LH hlaut Hestamannafélagið Skagfirðingur og veittu yfirreiðkennari félagsins og formaður æskulýðsdeildar Skagfirðings bikarnum móttöku. Fulltrúar frá hestamannafélögunum Mána, Hring, Funa, Herði, Freyfaxa og Sleipni sögðu frá sínum verkefnum og helstu áskorunum. Voru það virkilega áhugaverðar frásagnir því flest hestamannafélög eru að eiga við svipaðar áskoranir þó aðstæður hjá hverju félagi séu mismunandi. Að loknum hefðbundnum fundarstörfum var fundinum skipt upp í þrjá umræðuhópa sem fjölluðu um stefnumótun, gjaldkerastörf og nýliðunar -og æskulýðsmál. Mikil umræða og góð vinna var í umræðuhópunum. Í hópnum um stefnumótum urðu mjög líflegar umræður og margir snertifletir ræddir á hinum ýmsu málum og ljóst að það er heilmikið að vinna úr í framhaldinu. Fundinum var skipt upp í sex minni hópa sem fjölluðu hver um sig um ákveðna þætti í starfsemi LH, hvaða markmið skuli setja og hvernig skuli ná þeim. Stefnumótunarfundurinn var framhald af opnum stefnumótunarfundi sem haldinn var sl. vor með fulltrúum hestamannafélaganna. Hópurinn um æskulýðs- og nýliðunarmál fjallaði um þátttöku stráka í hestamennsku, félagshesthús og almenna stöðu hjá félögunum. Margar hugmyndir komu upp og góðar umræður sköpuðust. Í gjaldkerahópnum var rætt um samskipti við sveitarfélög, fjármál hestamannafélaga, félög í almannaheilaskráningu og fyrirmyndafélög ásamt styrkjum til hestamannafélaga. Fjármál hestamannafélaganna eru almennt í góðum málum og faglega staðið að þeim en slíkt er algjör forsenda fyrir því að gott samtal geti átt sér stað við sveitarfélögin þegar kemur að styrkjamálum hins opinbera. Félögin voru einnig hvött til að skrá félagið á almannaheillaskrá en það er gott verkfæri þegar leitað er styrkja hjá almennum fyrirtækjum og veitir skattaafslátt á móti. Einnig voru félögin hvött til að hefju vinnu við að gerast fyrirmyndarfélag ÍSÍ og er það holl og góð vinna til að bæta starfshætti félagsins. Félög geta leitað til hvors annars um þau gögn sem þarf að skila og voru félögin hvött til að vinna þau saman. Samhliða formannafundi var haldinn mótanefndafundur sem um tuttugu manns sátu, en fyrirhugað er að halda framahaldsmótanefndafund um næstu mánaðamót til að ræða frekar mótadagskrá ársins. Stjórn LH þakkar formönnum hestamannafélaga í landinu og öðrum þátttakendum á formannafundi fyrir afar uppbyggilegar umræður sem munu nýtast vel á komandi starfsári. Skýrsla stjórnar LH 2024-2025