U21-starfið komið á fulla ferð

23. janúar 2023

 

U21-landsliðshópur LH hittist á dögunum á æfingarhelgi í frábærri aðstöðu Eldhesta í Ölfusinu.

Helgin var vel nýtt í hin ýmsu atriði sem lúta að þjálfun og uppbyggingu keppnishesta liðsins og knapa þeirra.

Landsliðsþjálfari U21-hópsins, Hekla Katharína Kristinsdóttir hafði Sigurbjörn Bárðarson landsliðsþjálfara A-landsliðsins með sér alla helgina og fóru þau yfir málin með hverjum knapa og hesti fyrir sig.

„Ég fékk Sigurbjörn til liðs við mig til þess að vera með mér þegar ég myndi athuga stöðuna á hverjum knapa og hesti. Það var mikið gæfuspor fyrir mig að fá hann með mér. Hans reynsla og nærvera er eitthvað sem var ómetanlegt að fá“ sagði Hekla Katharína eftir helgina.

„Öll voru þau á góðum stað með hestana sína. Öll eru þau frábærlega ríðandi og hægt er að sjá mjög líklega kandidata fyrir HM.

Sigurbjörn hafði það á orði við mig að velja 5 fulltrúa úr þessum hóp yrði gríðarleg áskorun og það veit ég vel. Ásamt öllum þeim fyrir utan hópinn sem vilja sanna sig“ hélt hún áfram.

Fyrir utan verklega tíma í þjálfun hestanna voru haldnir fyrirlestrar fyrir hópinn.

Hinrik Sigurðsson hélt fyrirlestur um hugarþjálfun og það að vera best(ur) þegar á reynir. Hann ræddi við hópinn um hugarfarsþjálfun og mikilvægi hennar í undirbúningi íþróttafólks á öllum stigum fyrir sín verkefni og gaf hópnum ýmis verkfæri til þess að nýta sér og vinna með.

Sigurbjörn Bárðarson hélt í hádegishléinu á laugardeginum frábæran fyrirlestur um skeið og undirbúning skeiðs. Þar studdist hann við myndbrot úr þjálfunarmyndbandi sínu „Skeið undirbúningur-þjálfun“ ásamt því að hann fræddi knapana og jós úr viskubrunni sínum. Þetta var einstök stund og Sigurbjörn lagði svo sannarlega hjarta og sál á borðið. Hópurinn tók gríðarlega góðan þátt í fyrirlestrunum báðum og spurði margra spurninga.

Það er margt framundan hjá U21-hópnum í þjálfun, æfingum og keppni enda ætla þau sér öll að sanna sig fyrir sæti í landsliðshópnum sem verða fulltrúar Íslands á heimsmeistaramótinu í Hollandi á komandi sumri.

Fréttasafn

16. nóvember 2026
Styttist í uppskeruhátíð
13. nóvember 2026
Hestamannafélagið Sleipnir mun halda Íslandsmót fullorðinna og ungmenna 16.-20. júní 2027
11. nóvember 2026
Allir í Samskipahöllina annað kvöld
10. nóvember 2026
Knapar ársins verða heiðraðir á Uppskeruhátíð hestafólks
6. nóvember 2026
Heiðursviðurkenningar ÍSÍ veittar á Landsþingi LH
5. nóvember 2026
Gullmerki veitt á Landsþingi
3. nóvember 2026
Könnun til félagsmanna
2. nóvember 2026
Að loknu hverju landsþingi skipar stjórn Landssambands hestamannafélaga í nefndir sambandsins til tveggja ára. Nefndarstörf eru undirstaðan í öllu starfi LH og mikilvægt að fá öfluga sjálfboðaliða sem eru tilbúnir að leggja sitt af mörkum. Nefndastarf á vegum LH er skemmtilegt og fræðandi, auk þess sem störf í nefndum eru gefandi og til þess fallin að efla tengslanet nefndafólks. Ef þú ert tilbúin/n til að starfa í nefnd hjá LH þá sækir þú um á sértöku umsóknareyðublaði . Frestur til að gefa kost á sér í nefndastörf LH er 20. nóvember. Nefndirnar sem um ræðir eru: Keppnisnefnd Keppnisnefnd fjallar um mál sem stjórn LH vísar til hennar en hefur að öðru leyti frumkvæðisrétt að málefnum sem undir hana heyra. Hlutverk nefndarinnar er að bæta reglur er viðkoma keppni í hestamennsku, þannig að þær séu einfaldar, skiljanlegar og skýrar. Laganefnd Hlutverk nefndarinnar er að að bæta regluverk LH, þannig að það sé einfalt, skiljanlegt og skýrt og vera stjórn til ráðgjafar er varðar túlkun á lögum og reglum LH. Nefndin sér einnig um að breytingar á lögum og reglum sem samþykktar eru á FEIF-þingi og landsþingi LH séu rétt færð inn í lög og reglur LH og fara yfir tillögur til landsþings. Landsliðs- og afreksnefnd Hlutverk landsliðs- og afreksnefndar er að móta umgjörð um afreksmál LH og halda utan um landsliðshópa og hæfileikamótun LH. Nefndin er einnig fjáröflunarnefnd fyrir afreksstarf LH. Nefndin skipuleggur landsliðsferðir og fylgir eftir landsliðum Íslands í hestaíþróttum á HM og NM. Mannvirkjanefnd Hlutverk nefndarinnar er að vera ráðgefandi varðandi gerð og notkun mannvirkja á hestaíþróttasvæðum hestamannafélaganna. Einnig ber nefndinni að vera stjórn innan handar varðandi lágmarkskröfur sem gerðar eru til mótshaldara Íslandsmóta og Landsmóta hvað varðar aðstæður á mótssvæði. Menntanefnd Hlutverk nefndarinnar er að vera sérfræðilegur ráðunautur sambandsstjórnar LH í öllum málefnum er varða fræðslu og menntun. Nefndin heldur utan um endurmenntunarnámskeið fyrir reiðkennara og staðfestir virka reiðkennara til FEIF. Annað hvert ár stendur nefndin fyrir endurmenntunarráðstefnu. Tölvunefnd Hlutverk nefndarinnar er að tryggja aðgengi aðildarfélaga LH að framúrskarandi forriti sem reiknar út niðurstöður móta og birtir niðurstöður á aðgengilegan hátt. Nefndin stuðlar að þróun mótaforrits í samræmi við kröfur samtímans. Úrskurðar- og aganefnd Úrskurðar- og aganefnd LH skal skipuð þremur aðalmönnum og tveimur til vara, formaður skal vera löglærður. Úrskurðar- og aganefnd úrskurðar um brot á lögum, reglugerðum og reglum LH og ákvarðar viðurlög, í samræmi við reglur Úrskurðar- og aganefndar. Æskulýðsnefnd Hlutverk Æskulýðsnefndar er að efla fræðslu um æskulýðsmál, gæta hagsmuna og jafnræðis æskunnar í íþróttinni, auka fræðslu æskulýðsfulltrúa um allt land og styðja við þá í starfi. Nefndin sér einnig um val þátttakenda á FEIF Youth Cup og Youth Camp. Útbreiðslu- og nýliðunarnefnd Hlutverk nefndarinnar er að vinna að útbreiðslu og kynningu á hestaíþróttum og stuðla að jákvæðri ímynd hestaíþrótta. Nefndinni er einnig ætlað að vinna að aukinni útbreiðslu og umfjöllun um hestaíþróttir. Öryggisnefnd Hlutverk nefndarinnar er að vera vakandi yfir því sem varðar öryggi hestafólks hvort sem er í búnaði hestafólks eða umhverfi hestaíþrótta. Nefndin stuðlar að öryggi á reiðvegum og annars staðar þar sem hestamennska er stunduð og sér um að fræða hinn almenna hestamann um hvernig hægt er að bæta öryggi í nærumhverfi. Ef þú ert tilbúin til að starfa í nefnd hjá LH þá sækir þú um með því að smella hér .
31. október 2026
Ný stjórn LH kjörin á Landsþingi
31. október 2026
Ragnhildur Gísladóttir dregur framboð til aðalstjórnar til baka
Lesa meira