Eik og Kristín Rut Íslandsmeistarar í gæðingatölti

20. júlí 2025

Laugardagur á Íslandsmóti barna og unglinga hófst á keppni í unglinga- og barnaflokki í gæðingakeppni. Þetta voru síðustu greinar í forkeppni mótsins og seinnipartinn fóru fram B-úrslit í öllum flokkum.

Efst í barnaflokki eru sigurvegarar síðast Landsmóts, Viktoría Huld Hannesdóttir á Þin frá Enni með einkunnina 8,76 en hún er einnig í öðru sæti á Steinari frá Stíghúsi með 8,62. Þriðja inn í A úrslit er Svala Björk Hlynsdóttir á Eindísi frá Auðsholtshjáleigu með 8,50 í einkunn. Í unglingaflokki er það Ída Mekkín Hlynsdóttir sem leiðir á Ísafold frá Kirkjubæ og einkunnina 8,67. Rétt á eftir henni eru þau Eik Elvarsdóttir og Valur frá Stangarlæk 1 með 8,65 í einkunn og Dagur Sigurðsson með Lér frá Stóra-Hofi og einkunnina 8,61.


Eik Elvarsdóttir og Valur frá Stangarlæk 1 eru Íslandsmeistarar í gæðingatölti unglinga með einkunnina 8,77. Í öðru sæti varð Elva Rún Jónsdóttir á Hraunari frá Vorsabæ II með 8,69 í einkunn og í því þriðja Kristín Eir Hauksdóttir Holaker á Þokka frá Skáney með 8,62 í einkunn.


Kristín Rut Jónsdóttir er Íslandsmeistari í gæðingatölti í barnaflokki með Straum frá Hofsstöðum, Garðabæ en þau unnu með 8,78 í einkunn. Viktoría Huld Hannesdóttir og Þinur frá Enni urðu í öðru sæti með 8,64 í einkunn og í því þriðja varð Valdís Mist Eyjólfsdóttir á Hnotu frá Þingnesi með 8,60 í einkunn. 


B-úrslit í fjórgangi fóru fram seinnipartinn þar sem Elimar Elvarsson varð efstur í unglingaflokki með Sölku frá Hólateigi en þau hlutu einkunnina 6,87. Í barnaflokki varð Oliver Sírén Matthíasson efstur með Gróu frá Þjóðólfshaga 1 með 6,43 í einkunn. Í B-úrslitum í fimmgangi varð efst Ísabella Helga Játvarðsdóttir með Lávarð frá Ekru en þau hlutu einkunnina 6,40.


Efst í B-úrslitum í slaktaumatölti, unglingaflokki varð Erla Rán Róbertsdóttir með Gletting frá Skipaskaga en þau hlutu einkunnina 6,83. Í B-úrslitum í tölti T3 barnaflokki urðu efstar þær Helga Rún Sigurðardóttir og Drottning frá Íbishóli með 6,50 í einkunn og tölt T1 í unglingaflokki urðu efstir Anton Óskar Ólafsson og Fengsæll frá Jórvík með einkunnina 6,83. 


Greta Berglind Jakobsdóttir varð efst í sterkum B-úrslitum í unglingaflokki en hún og Hágangur frá Miðfelli 2 hlutu 8,60 í einkunn. Í barnaflokki varð efst Gabríela Máney Gunnarsdóttir með Bjart frá Hlemmiskeiði 3 en þau hlutu 8,72 í einkunn! 


Það stefnir í góðan sunnudag á glæsilegu svæði hestamannafélagsins Sörla í Hafnarfirði þar sem A-úrslit fara fram.



Fréttasafn

16. nóvember 2026
Styttist í uppskeruhátíð
13. nóvember 2026
Hestamannafélagið Sleipnir mun halda Íslandsmót fullorðinna og ungmenna 16.-20. júní 2027
11. nóvember 2026
Allir í Samskipahöllina annað kvöld
10. nóvember 2026
Knapar ársins verða heiðraðir á Uppskeruhátíð hestafólks
6. nóvember 2026
Heiðursviðurkenningar ÍSÍ veittar á Landsþingi LH
5. nóvember 2026
Gullmerki veitt á Landsþingi
3. nóvember 2026
Könnun til félagsmanna
2. nóvember 2026
Að loknu hverju landsþingi skipar stjórn Landssambands hestamannafélaga í nefndir sambandsins til tveggja ára. Nefndarstörf eru undirstaðan í öllu starfi LH og mikilvægt að fá öfluga sjálfboðaliða sem eru tilbúnir að leggja sitt af mörkum. Nefndastarf á vegum LH er skemmtilegt og fræðandi, auk þess sem störf í nefndum eru gefandi og til þess fallin að efla tengslanet nefndafólks. Ef þú ert tilbúin/n til að starfa í nefnd hjá LH þá sækir þú um á sértöku umsóknareyðublaði . Frestur til að gefa kost á sér í nefndastörf LH er 20. nóvember. Nefndirnar sem um ræðir eru: Keppnisnefnd Keppnisnefnd fjallar um mál sem stjórn LH vísar til hennar en hefur að öðru leyti frumkvæðisrétt að málefnum sem undir hana heyra. Hlutverk nefndarinnar er að bæta reglur er viðkoma keppni í hestamennsku, þannig að þær séu einfaldar, skiljanlegar og skýrar. Laganefnd Hlutverk nefndarinnar er að að bæta regluverk LH, þannig að það sé einfalt, skiljanlegt og skýrt og vera stjórn til ráðgjafar er varðar túlkun á lögum og reglum LH. Nefndin sér einnig um að breytingar á lögum og reglum sem samþykktar eru á FEIF-þingi og landsþingi LH séu rétt færð inn í lög og reglur LH og fara yfir tillögur til landsþings. Landsliðs- og afreksnefnd Hlutverk landsliðs- og afreksnefndar er að móta umgjörð um afreksmál LH og halda utan um landsliðshópa og hæfileikamótun LH. Nefndin er einnig fjáröflunarnefnd fyrir afreksstarf LH. Nefndin skipuleggur landsliðsferðir og fylgir eftir landsliðum Íslands í hestaíþróttum á HM og NM. Mannvirkjanefnd Hlutverk nefndarinnar er að vera ráðgefandi varðandi gerð og notkun mannvirkja á hestaíþróttasvæðum hestamannafélaganna. Einnig ber nefndinni að vera stjórn innan handar varðandi lágmarkskröfur sem gerðar eru til mótshaldara Íslandsmóta og Landsmóta hvað varðar aðstæður á mótssvæði. Menntanefnd Hlutverk nefndarinnar er að vera sérfræðilegur ráðunautur sambandsstjórnar LH í öllum málefnum er varða fræðslu og menntun. Nefndin heldur utan um endurmenntunarnámskeið fyrir reiðkennara og staðfestir virka reiðkennara til FEIF. Annað hvert ár stendur nefndin fyrir endurmenntunarráðstefnu. Tölvunefnd Hlutverk nefndarinnar er að tryggja aðgengi aðildarfélaga LH að framúrskarandi forriti sem reiknar út niðurstöður móta og birtir niðurstöður á aðgengilegan hátt. Nefndin stuðlar að þróun mótaforrits í samræmi við kröfur samtímans. Úrskurðar- og aganefnd Úrskurðar- og aganefnd LH skal skipuð þremur aðalmönnum og tveimur til vara, formaður skal vera löglærður. Úrskurðar- og aganefnd úrskurðar um brot á lögum, reglugerðum og reglum LH og ákvarðar viðurlög, í samræmi við reglur Úrskurðar- og aganefndar. Æskulýðsnefnd Hlutverk Æskulýðsnefndar er að efla fræðslu um æskulýðsmál, gæta hagsmuna og jafnræðis æskunnar í íþróttinni, auka fræðslu æskulýðsfulltrúa um allt land og styðja við þá í starfi. Nefndin sér einnig um val þátttakenda á FEIF Youth Cup og Youth Camp. Útbreiðslu- og nýliðunarnefnd Hlutverk nefndarinnar er að vinna að útbreiðslu og kynningu á hestaíþróttum og stuðla að jákvæðri ímynd hestaíþrótta. Nefndinni er einnig ætlað að vinna að aukinni útbreiðslu og umfjöllun um hestaíþróttir. Öryggisnefnd Hlutverk nefndarinnar er að vera vakandi yfir því sem varðar öryggi hestafólks hvort sem er í búnaði hestafólks eða umhverfi hestaíþrótta. Nefndin stuðlar að öryggi á reiðvegum og annars staðar þar sem hestamennska er stunduð og sér um að fræða hinn almenna hestamann um hvernig hægt er að bæta öryggi í nærumhverfi. Ef þú ert tilbúin til að starfa í nefnd hjá LH þá sækir þú um með því að smella hér .
31. október 2026
Ný stjórn LH kjörin á Landsþingi
31. október 2026
Ragnhildur Gísladóttir dregur framboð til aðalstjórnar til baka
Lesa meira