„Hvetjum alla til að koma og hafa gaman saman“

27. nóvember 2024

Viðtal við Kristinn Skúlason formann landsliðsnefndar LH í tilefni að menntahelgi landsliðanna um helgina.

Um helgina verður menntahelgi í reiðhöllinni í Víðidal. Á laugardeginum munu A-landsliðsknaparnir vera með kennslusýningar og á sunnudeginum verða tvær sýningar þar sem annars vegar munu koma fram knapar í U21 landsliðinu og hins vegar knapar í hæfileikamótun LH.

„Það er spennandi vika framundan og undirbúningur í fullum gangi. Á laugardaginn er kennslusýning A landsliðsins sem sett hefur verið saman af Sigurbirni Bárðasyni, A landsliðsþjálfara. Verður spennandi og fróðlegt að fylgjast með því. Við munum senda stærsta landslið Íslands frá upphafi á Heimsmeistaramótið í Sviss á næsta ári og er gaman að fá að skyggnast inn í undirbúninginn fyrir það. Á sunnudaginn byrjum við á sýningu með knöpunum í hæfileikamótun LH en Sigvaldi Lárus Guðmundsson er yfirþjálfari hæfileikamótunar. Kynnt verður starfsemin og þá uppbyggingu sem fer fram innan hæfileikamótunarinnar, sem er gríðarleg. Við höfum ekki orðið undan að taka á móti umsóknum og settum af stað B hóp í hæfileikamótun til að leyfa fleirum að komast að, nú telur hópurinn um 55 knapa“ segir Kristinn Skúlason formaður landsliðsnefndar LH. „Eftir það tekur Hekla Katharína Kristinsdóttir, landsliðsþjálfari U21, við með hópinn sinn sem eru 14 knapar. Þar eru frábærir krakkar og við erum í kjörstöðu miðað við önnur lönd með slíka breidd af knöpum.“

Frítt er inn á sunnudeginum en miðaverð á kennslusýningar á laugardeginum eru 5.900 kr og fer miðasala fram HÉR. Dagskrá hefst kl. 10:00 á laugardeginum en á sunnudeginum byrjar hún kl. 13:00. Á laugardaginn verður boðið upp á hamborgarhrygg með öllu tilheyrandi, heitt súkkulaði og vöfflur og á sunnudeginum verður boðið upp á heitt súkkulaði og vöfflur. Allur ágóði rennur til styrktar landsliðsins.

„Við hvetjum alla til þess að koma og njóta þess að sjá hvað við erum búin að byggja upp og sjá hvað þessir krakkar eru flinkir og góðir. Það er líka svo gaman að sjá hvað hesturinn tengir alla fjölskylduna saman. Ef einn er í hestunum þá er eiginlega öll fjölskyldan með. Það geta allir tekið þátt. Besta dæmið sem ég get tekið er um mig sjálfan. Við vorum öll í hestunum nema ein dóttir mín sem var ekki en hún var alltaf með okkur og tók þátt í þessu og studdi alla aðra.“

Á föstudagskvöldinu verður upphitun fyrir helgina en þá mun fara fram PubQuiz í reiðhöllinni í Víðidal.

„Við ætlum að hafa gaman um helgina. Njóta og sýna hvað við erum búin að vera gera og leggja til íþróttarinnar. Hvetjum alla til að koma og hafa gaman saman,“ segir Kristinn að lokum.

Sýnikennslurnar á laugardeginum eru eftirfarandi:

  • Ragnhildur Haraldsdóttir: Tenging taumhringsvinnu við form og gangtegundir.
  • Glódís Sigurðardóttir: Auka skrefastærð með formi og stillingu.
  • Hinrik Bragason: Undirbúningur fyrir gæðingaskeið – samspil í gleði og vilja í verki.
  • Guðmunda Ellen Sigurðardóttir: Tenging sætisnotkunar og taums, samhæfing knapa og hests
  • Helga Una Björnsdóttir: Slaktaumatölt – undirbúningur, aðferðir, hestgerðir
  • Jóhanna Margrét Snorradóttir: Hraðabreytingar, samspil safnandi hvetjandi og hamlandi æfingar.
  • Teitur Árnason: Viðhalda gleði með fjölhæfni og léttleika.

 

Viðburðurinn verður í beinni útsendingu á síðu Eiðfaxa

Frétt fengin af vef Eiðfaxa.

Fréttasafn

16. nóvember 2026
Styttist í uppskeruhátíð
13. nóvember 2026
Hestamannafélagið Sleipnir mun halda Íslandsmót fullorðinna og ungmenna 16.-20. júní 2027
11. nóvember 2026
Allir í Samskipahöllina annað kvöld
10. nóvember 2026
Knapar ársins verða heiðraðir á Uppskeruhátíð hestafólks
6. nóvember 2026
Heiðursviðurkenningar ÍSÍ veittar á Landsþingi LH
5. nóvember 2026
Gullmerki veitt á Landsþingi
3. nóvember 2026
Könnun til félagsmanna
2. nóvember 2026
Að loknu hverju landsþingi skipar stjórn Landssambands hestamannafélaga í nefndir sambandsins til tveggja ára. Nefndarstörf eru undirstaðan í öllu starfi LH og mikilvægt að fá öfluga sjálfboðaliða sem eru tilbúnir að leggja sitt af mörkum. Nefndastarf á vegum LH er skemmtilegt og fræðandi, auk þess sem störf í nefndum eru gefandi og til þess fallin að efla tengslanet nefndafólks. Ef þú ert tilbúin/n til að starfa í nefnd hjá LH þá sækir þú um á sértöku umsóknareyðublaði . Frestur til að gefa kost á sér í nefndastörf LH er 20. nóvember. Nefndirnar sem um ræðir eru: Keppnisnefnd Keppnisnefnd fjallar um mál sem stjórn LH vísar til hennar en hefur að öðru leyti frumkvæðisrétt að málefnum sem undir hana heyra. Hlutverk nefndarinnar er að bæta reglur er viðkoma keppni í hestamennsku, þannig að þær séu einfaldar, skiljanlegar og skýrar. Laganefnd Hlutverk nefndarinnar er að að bæta regluverk LH, þannig að það sé einfalt, skiljanlegt og skýrt og vera stjórn til ráðgjafar er varðar túlkun á lögum og reglum LH. Nefndin sér einnig um að breytingar á lögum og reglum sem samþykktar eru á FEIF-þingi og landsþingi LH séu rétt færð inn í lög og reglur LH og fara yfir tillögur til landsþings. Landsliðs- og afreksnefnd Hlutverk landsliðs- og afreksnefndar er að móta umgjörð um afreksmál LH og halda utan um landsliðshópa og hæfileikamótun LH. Nefndin er einnig fjáröflunarnefnd fyrir afreksstarf LH. Nefndin skipuleggur landsliðsferðir og fylgir eftir landsliðum Íslands í hestaíþróttum á HM og NM. Mannvirkjanefnd Hlutverk nefndarinnar er að vera ráðgefandi varðandi gerð og notkun mannvirkja á hestaíþróttasvæðum hestamannafélaganna. Einnig ber nefndinni að vera stjórn innan handar varðandi lágmarkskröfur sem gerðar eru til mótshaldara Íslandsmóta og Landsmóta hvað varðar aðstæður á mótssvæði. Menntanefnd Hlutverk nefndarinnar er að vera sérfræðilegur ráðunautur sambandsstjórnar LH í öllum málefnum er varða fræðslu og menntun. Nefndin heldur utan um endurmenntunarnámskeið fyrir reiðkennara og staðfestir virka reiðkennara til FEIF. Annað hvert ár stendur nefndin fyrir endurmenntunarráðstefnu. Tölvunefnd Hlutverk nefndarinnar er að tryggja aðgengi aðildarfélaga LH að framúrskarandi forriti sem reiknar út niðurstöður móta og birtir niðurstöður á aðgengilegan hátt. Nefndin stuðlar að þróun mótaforrits í samræmi við kröfur samtímans. Úrskurðar- og aganefnd Úrskurðar- og aganefnd LH skal skipuð þremur aðalmönnum og tveimur til vara, formaður skal vera löglærður. Úrskurðar- og aganefnd úrskurðar um brot á lögum, reglugerðum og reglum LH og ákvarðar viðurlög, í samræmi við reglur Úrskurðar- og aganefndar. Æskulýðsnefnd Hlutverk Æskulýðsnefndar er að efla fræðslu um æskulýðsmál, gæta hagsmuna og jafnræðis æskunnar í íþróttinni, auka fræðslu æskulýðsfulltrúa um allt land og styðja við þá í starfi. Nefndin sér einnig um val þátttakenda á FEIF Youth Cup og Youth Camp. Útbreiðslu- og nýliðunarnefnd Hlutverk nefndarinnar er að vinna að útbreiðslu og kynningu á hestaíþróttum og stuðla að jákvæðri ímynd hestaíþrótta. Nefndinni er einnig ætlað að vinna að aukinni útbreiðslu og umfjöllun um hestaíþróttir. Öryggisnefnd Hlutverk nefndarinnar er að vera vakandi yfir því sem varðar öryggi hestafólks hvort sem er í búnaði hestafólks eða umhverfi hestaíþrótta. Nefndin stuðlar að öryggi á reiðvegum og annars staðar þar sem hestamennska er stunduð og sér um að fræða hinn almenna hestamann um hvernig hægt er að bæta öryggi í nærumhverfi. Ef þú ert tilbúin til að starfa í nefnd hjá LH þá sækir þú um með því að smella hér .
31. október 2026
Ný stjórn LH kjörin á Landsþingi
31. október 2026
Ragnhildur Gísladóttir dregur framboð til aðalstjórnar til baka
Lesa meira