Flutningskeðjan til Sviss - vant fólk í hverju rúmi

HM í Sviss er eins og allir hestamenn vita handan við hornið og hefst formlega á þriðjudaginn í næstu viku með kynbótasýningum og keppni í gæðingaskeiði. Íslensku hestarnir eiga langt og mikið ferðalag á mótsstað en í gærkvöldi, mánudagskvöld, flugu þeir til Liége í Belgíu, fóru þaðan eldsnemma í morgun, þriðjudag, og komu til Birmenstorf í Sviss þar sem mótið fer fram eftir ríflega sólahrings ferðalag.

Það er margt sem þarf að ganga upp svo að hestarnir komist á áfangastað á þægilegan máta, eins óþreyttir og kostur er, og margar hendur sem leggja mikið á sig til þess að greiða götur liðsins með hrossin. Þegar undirbúningur ferðalagsins hefst má segja að það virki eins og heilmikil keðja að sjá til þess að ferðin gangi vel og það er talsvert flóknara að flytja hross og búnað til Sviss en annarra Evrópulanda þar sem Sviss er ekki í Evrópusambandinu. Með í för er allur búnaður og allt hey sem hrossin fá á meðan á mótinu stendur, flutt frá Íslandi auk hestanna sjálfra.

Villi í Litlu-Tungu hefur um árabil séð íslenska landsliðinu fyrir heyi og því er tryggt gæðafóður fyrir hrossin yfir allt mótið. Búnaður knapanna sem fylgir hverjum hesti er pakkaður í sérmerkta kassa hjá hverjum og einum. Þessum kössum og öllum farmi var safnað í Víðidalnum á sunnudagskvöldið og Ómar Jóhannsson bílstjóri hjá Líflandi sá um að keyra farminn til Keflavíkur fyrir brottför.

Horse Export, Gunnar og Krissa, sjá um útflutninginn á hrossunum og Tóta Eyvinds hefur stýrt þeirri vinnu eins og herforingi en sú vinna er meira en að segja það því allir pappírar þurfa að vera í góðum farvegi til þess að þetta gangi.

RML, Ráðgjafarmiðstöð Landbúnaðarins, styrkir landsliðið um útgáfu vegabréfa fyrir hestana og hafa lagt á sig mikinn krók í sumarleyfistíð til þess að gefa út passa fyrir hrossin á þeim tíma sem hentar fyrir útflutninginn. Það er mikill styrkur fyrir landsliðið að eiga hauk í horni í Hrefnu hjá RML sem prentaði passa samdægurs og dýralæknisskoðun fór fram á nokkrum stöðum yfir daginn.

MAST sér um að votta passana, gerir lokaheilbrigðisskoðun og sannreynir að allt stemmi á útflutningsdeginum, fyrir flugið og gekk það útkall ljómandi vel undir styrkri stjórn Úndínu dýralæknis hjá MAST.

Icelandair Cargo styrkir svo liðið með því að fljúga hrossum, heyi og búnaði út. Þar var alllur undirbúningur með miklum sóma, búið var að fljúga hluta af heyinu út deginum fyrr til þess að það væri klárt á flugvellinum við komu hrossanna og hægt að gefa vatn og hey strax eftir lendingu í Liége. Í vélinni fylgja hestunum vanir menn, undir stjórn G. Snorra Ólasonar sem var sérstaklega fenginn í þetta flug, enda klettöruggur fylgdarmaður hrossa um árabil.

Þegar út er komið er það Inga Mueller sem sér um öll okkar mál, en hún er innflutningsaðili hrossanna í Evrópu. Hún sér um að keyra hrossin og búnað á mótsstað, sér um öll samskipti við landamæra- og tollayfirvöld á leið okkar til Sviss og sér um að allir skili sér á áfangastað.

Fimm knapar og Elli okkar á Skíðbakka fóru utan í gærmorgun og voru mætt á flugvöllinn til þess að taka á móti hrossunum inni á flugvallarsvæðinu. Þau sjá um að taka vafninga af fótum hrossanna, gefa þeim vatn og hey og koma þeim í hvíld fyrir flutninginn landleiðina. Aðrir landsliðsknapar flugu svo beint til Sviss í morgun og voru tilbúnir á mótsstað að taka á móti hrossunum við komu.

Máltakið segir að engin keðja er sterkari en veikasti hlekkurinn og það má með sanni segja að flutningskeðjan, þó löng sé, hafi haldið og allir eru klárir á áfangastað. LH færir öllum þeim sem hafa unnið baki brotnu að því að láta ferðalagið ganga upp, kærar þakkir.

Það sem nú tekur við er endurheimt fyrir hrossin, göngu- og hjólatúrar í rólegheitum til þess að aðlagast nýju umhverfi og svo hefjast æfingar og þjálfun fyrir mótið sjálft á föstudaginn.

Við munum fygljast ítarlega með gangi mála.